Bi maqırhonutho dhuwle athmıl u rişono d’Amerika Donald Trump, mawdacle dmahıtle gumruk calu mal d’mınyono celoyo d’athrawotho frişe dbritho

WASHINGTON –  Athmıl b’lalyo mawdıci a paketat du gumruk dımbayanwole u rişono d’Amerika cal hol 60 athrawotho frişe dbritho dkıtyo u asasayda gumruk d’10 ba mo. Elo u gumruk dmahıt calu mal du Huyodo d’Urifi 20 ba mo’yo wu gumruk dmazıd 34 ba mo calu Sin gıdmote ucdo l’54 ba mo wu kmıntır di paketathe dfayto la haye 9 bu yarhano d’Nison.

Ba hfuxye dmahwe mqabıl d’Amerika bi sbuthathe’ste du gumruk dıkmifaşqo ğalabe qşitho mawdıc, dbritho lo kubco qrobo di tagorutho, cal dhathe belhude gıdsaymo u camo zıttır faqiro u britho gıdhuwyo b’qento rabo. U yawmano dmawdacle Trump i paketayde du gumruk mahıtle ışme; U Yawmo di hirutho, mahwe hfuxye qaşye mi rişonitho du Komisyon d’Urifi Ursula von der Leyen.

Lfuth von der Leyen, u şuhlofano di tagorutho dbritho gıdmadcıf u macırbo u dilonoyith u haqlo du momuno dbritho. Bebzabno u Huyodo d’Urifi uğer athrawotho beynothaye Britania, m’akadlın dgıdobın cayni funoyo l’Amerika wu Sin’ste mahwele hfuxyo qaşyo u tlıble me Amerika, baroyo dmaqimo u fusqonano du gumruk.

Camgabe dan athrawothani dımbahaslan aclaye dmidi nişo lu gumruk d’Amerika kito’ste; Kambodja-49%, Vietnam-46%, Swisra-31%, İsroyel-17%, u Hınd-26%, Australia 10 ba mo. Camgabe d’Australia, mahıt’ste gumruk cal gzıryothayda dlıkhoye noşo ebeye jğer ma pingvin. İ sbuthathe du gumruk d’Amerika, baroyo m’atharle adyawma safrayto’ste cali borsa dbritho.