29/01/2023

SWED: Qoyumo Yusuf Aydin mu gabo da Mşihoye Demoqratoye mnaqe mşalo dcala zedqe da qalilotho Mşihoye

U qoyumo du camaydan mu gabo da Mşihoye Demoqratoye bu parlamento du Swed-Yusuf Aydin, mnaqe mşalo dcala zedqe da qalilotho Mşihoye. Aydin dkıtyo ucdo bi Sictho du momuno bu parlamento du Swed, gıdmcaqıb u fulhono dıkmaşe u Swed leşan a qalilotho Mşihoye dhowelın mkono dmacişi i haymonuthathe b’britho.

Yusuf Aydin mnaqewo mi marcitho d’Stockholm xıd qoyumo mu gabo da Mşihoye Demoqratoye lu parlamento du Swed ba 2022 u kıtle’ste duktho bi Sictho du momuno bu parlamento du athro uğer wolyotho frişe. Ucdo’ste u qoyumo du camaydan, qayıthle wolitho hreto ulsoyto.

Lfuth u tebo dfris bi dafo du gabo, Aydin dkıtyo cımre 40 eşne umi qritho d’Hah d’Turabdin qayıthle mşalutho dhowe u malolo dcala zedqe da qalilotho Mşihoye b’britho. Awkith u qoyumo bıthır mucdo, gıdmcaqıb a fulhone dıkmaşe u Swed leşan qudri a qalilotho Mşihoye dımdawmi dmacişi i haymonuthathe b’britho.

Bu mamlo dsımle Yusuf Aydin cali wolithathe mırle; Fsihoyo’no cali wolithathe leşan u hefodo da zedqe da qalilotho Mşihoye udu gabaydi kımahıt yuqro cali sbuthathe. A Mşihoye, kmırdofi zıttır ma tawdiyotho hrene, wu Swed kibe dmıştace dawro rabo ban athrawotho dıkmırdofi a Mşihoye.

Bu tebano’ste griş u zuhoro calu taşroro şatonoyo dfrısle u tukoso Mşihoyo d’Open Doors dmawdacle, dhol 360 milyone d’Mşihoye kmitafiti b’rdufye mcal fothe di haymonuthathe b’britho. Uha man athrawothani Turkiya’yo dkuthyo bu darğo da 41 di lohithathe d’Open Doors, dıkmaşın rdufye cala qalilotho Mşihoye.