Amerika gidmdawmo ba tedbirayda calu rejim d’Suriya

U mcadrono du malolo di wazirutho di baroyutho d’Amerika Vedant Patel huwle athmıl maqırhonutho lu tbocofroso cali aykanoyutho d’Suriya ubu mamlayde Patel, kali dilonoyith cala hawbe barbroye dsımle u rejim du rişathro d’Suriya Başar al Asad.

Beyn da tedbirani dmahıtla Amerika calu rejim d’Suriya, kito u qyomo d’Qaysar dıkromız cala hawbe barbroye dsımle. Bu mamlayde Patel mırle; Woşington gıdmdawmo dımhaşwo i şultonutho d’Darımsuq ba hawbe barbroye dsimi calu camo d’Suriya. U rejim d’al Asad kule sımle hawbe du qrobo u hawbe mqabıl di noşutho u calathe, klozım dmihaşwi.

Bu funoyo dhuwle Patel calu şwolo dımşayıl mene ma gelyunore cala tedbirani dcalu rejim d’Suriya zıttır kım’athri u camo du athro mırle; Amerika gıdsaymo u mede dkothe mena dhukmo u rejim cala hawbe dsımle mqabıl du camayde. Amerika kımtaybo lumode leşan dmitaltım mcadronutho lu camo d’Suriya.

Athmıl’ste i Tahrazto du Muklo d’Emwotho Mhaydotho grışwola u zuhoro calu qrobo, calu timo da zuze d’Suriya wu kriz du momuno du athro dxlıqle kafno rabo bu athro hani zabno d’12 eşne. Lfuth WFP, cal qariwo gıdfoyış hol 70 ba mo du camo d’Suriya sniqoyo l’mcadronutho msarhabto.