Sxiro i maşritho d’Dacış b’Şigur

İ maşritho d’Alcumla dgıdsaymowa baytoyutho l’casrowat olufe d’marıhbone dı Dacış sxiro. İ maşrithathe dıkmişatsowa qariwo mi fnutho d’Şigur bu garbiyo du Iraq sxiro bi netiçe da fulhone udu protesto dsımlın a’comure d’Şigur cama hfite u hın qoyume mi hiğmonutho d’Ninwe.

İ rişathkarxutho di qastra d’Xansor dkıtyo bi fnitho d’Şigur bu garbiyo du Iraq Rana Qaski, bi maqırhonutho dhula li dafo d’Pukmedia mırla “a’fulhone da comure d’Şigur cam hın qoyume u menyono celoyo dı hfite u nahire makşarlın bu sxoro di maşritho d’Alcumla. Ubu şıkılano madıryo i tahrazto du nqolo d’30 marıhbone dı Dacış dıgmitahtiwo qariwo mu qtolcamo dsımwole Dacış cala Yezidoye d’Şigur bi şato da 2014”.

Bebzabno, i rişathkarxutho Qaski mawdacla da comure da tarte qastrat d’Alrabica u Alzummar mıştacelın hınneste dawro bu sxoro di maşrithathe dkıtwola sımca lo tawto.

Meqım mathe, nahire u hfite u qoyume mi hiğmonutho d’Ninwe mzaharwolın mu qento dmişatıs maşritho da marıhbone dı Dacış qariwo ma debhaththe b’Şigur, ube bzabno mawdacwolın da mşatsone di maşrithathe lımyaqarlın lo a’comure d’Şigur uloste u admo dbızlın anabnaththe wa yaqrothathe ba hçome marıhbone dsımwole u tukoso dı Dacış.

Ba yarhe dşaficina, i şultonutho du Iraq fsıqwola dnıqlo a’grube marıhbone dı Dacış dkıtlın ğensoyutho Iraqoyto mi maşritho d’Alhol dkıtyo bu qlimo di Gozarto d’Bethnahrin d’Suriya, udmitarkıwi a’marıhbonani bi maşritho d’Alcumla dıkmişatsowa bi qastra d’Alzummar bu garbiyo du Iraq.

İ maşrithathe d’Alcumla dıkmişaklowa m’4 alfo xaymotho, matınwo a’fulhone di mşatsonuthayda l’50%.