Emwotho Mhaydotho: A galwoye klozem decri la botaththe

Bi mawdconutho dhuwle u malolo d’Emwotho Mhaydotho Stephane Dujarric mawdacle, u ğamo dıktucno Emwotho Mhaydotho cali aykanoyutho noşoyto mahişonitho da galwoye d’Suriya-dhol 11 milyone dıbnaynoşo uhol 6 milyone galwoye, kıtte sniqutho l’mcadronutho noşoyto.

Bu mamlo dsımle Dujarric la gelyunore b’New York mırle; Kıtucnina ğamo, dilonoyith cali mşaynutho ucalu sutoro dhol 3 milyone dıbnaynoşo bu qlimo d’İdlıb u hedore. Ba buhone dsimi mu zabno dımşarelın a taxtuşe bi harayto du yarho d’Nison dı şafıcina uholucdo, qtil alfo mdinoye; beynothaye mowat dtloye.

Bi sbutho da hçome qaşye dıkmisomi calu garbay madınho d’Suriya, Dujarric mırle; İ sbuthathe masırto’yo bu Komisyon celoyo da Galwoye  d’Emwotho Mhaydotho-UNHCR. Emwotho Mhaydotho kull naqla kımşaçco a galwoye bu sebyonathe dı ducri la dukothathe a şerşoye.

Calu qlimano du garbyo udu madınho d’Suriya wa hçome dmabdelın a hayle kaboşe d’Turkiya uda marhıbonayda d’Dacış udu Gbino d’al Nusra, mawdıc dhol 300 alfo bnaynoşo dı jbiri dımgalwın ma dukothathe, kıtulbi ducri la bothathe. A galwoye d’Rişcayno mawdaclın, dlayt mede dkibe dmaklelın mu dcoro dla dukothathe.

İ Mdabronurho yothoyto du garbyo udu madınho d’Suriya mbayanla maşıryotho u bınyone da madraşyotho, leşan dı qudri a galwoyani dfayşi ebeye hol dmicadlo i aykanoyutho da dukothathe. Elo a şutose u tukose qlimoye wi Mdabronutho yothoyto kıtte sniqutho l’snodo leşan dı qudri dımqadmi mcadronutho kamılto la galwoyani.