Taşdarto me DEM Parti simla socurutho l’Demirtaş bu hbuşyo d’Edirne b’Turkiya

EDIRNE, Turkiya — A rişone zawgoye d’DEM Tuncer Bakırhan u Tülay Hatimoğulları sımlın athmıl socurutho lu rişono zawgoyo catiqo d’HDP Selahattin Demirtaş u hawilın droşe yarixe camhıdode bu hbuşyo d’Edirne. Bıthır mi socuruthathe siim knuşyo lu tbocofroso wu rişono zawgoyo d’DEM Bakırhan, huwle mawdconutho cali ytawto dhawyo cam Demirtaş.

Bakırhan m’akadle du hulmono d’Demirtaş towo’yo u bşıkıl hfito dımdawım dımcaqıb u şuşoto du maşıqlo da droşe du şlomo u mawdacle, d’Demirtaş grışle u zuhoro cali sniqutho dkito dmidawım dmisım hboso leşan u dialog b’Turkiya. Bu mamlayde Bakırhan kali’ste cali sniqutho dkito d’Ankara dmarfıyo a hbişoye folitiqoye dımsikiwo-dilonoyith bi dacwa d’Kobani leşan dqudri dmaydi duktho ba fulhone du şlomo.

Bakırhan mkararle u fusqono dmıdwole u bethdino da zedqe noşoye d’Urifi bi sbuthathe du terfiyo d’Demirtaş. İ socuruthathe da 2 rişone zawgoye d’DEM l’Demirtaş simo, bu taro du hethotho du maşıqlo da droşe du şlomo dcam Ankara u kmıntır du rişono du parlamento d’Turkiya Numan Kurtulmuş’ste dloqe adyawma a 2 rişone zawgoye d’DEM bnişo dmikamli a prensibe du şekolo d’komisyon du parlamento leşan u maşıqlano da droşe.

Bu taro du maşıqlano du şlomo beyn da Kurdoye u Turkiya wi sbutho di PKK, i wazirutho di baroyutho d’Amerika athmıl bi maqırhonutho dhuwla, mawdacla dkıtyo fsihoyto li dawsathe i qamayto dımhalaqle u gerilla di PKK u dmahrawle u zaynayde u mırla; Kull dawse leşan u tehriwo du zayno u dmitaqım u qento, dawse msimonitho rabtho’yo.