Taşdarto m’MFS u m’ASU hawilın itawyotho mşahılfe b’Amerika

Taşdarto mi rişonutho du Mawtbo Folhoyo Suryoyo MFS cam hadome mu huyodo Suroyo d’Amerika hawilın itawyotho mşahılfe b’Amerika laşan dı durşi i sbutho da mşihoye du madınho mıscoyo u dilonoyith du Iraq u d’Suriya.

İ taşdarto hawila itawto cami wazirutho baroyto camu mawtbo di mşaynuytho d’Amerika u cami wazirutho du Sutoro d’Amerika Pentagon.

İ taşdarto d’MFS u huyodo Suroyo d’Amerika bi qamayto yatiwo cama mşale di tablitho d’Suriya di wazirutho di baroyutho d’Amerika u drışlın i aykanoyutho harayto du athro d’Suriya, u bebzabno amşale Amerikoye mıdlın mawdconwotho rwihe  cali aykanoyutho di mdabronutho yothoyto du garbyo u du madınho d’Suriya, me gabo hreno a mathlone di wazirutho baroyto mawdaclın du cwodo dkıtlın ucdo kıbci dmarkıwi zıtır u haylo dkıtlın u bebzabno gımdawmi ba fulhonathe dımqabıl da marıhbone d’Dacş u bcayni zabno gıdmşatsi a hayle dkıtlıın cama mutafikathe laşan dılo torın naqa hreto a hayle marıhbone dmahırwi a fınyothani.

Bi itawto trayonitho dhawyo camu mdabrono du madınho mıscoyo di wazirutho di mşaynutho d’Amerika drışlın i aykanoyutho d’Suriya u du Iraq, wu mdabrono mahkele bu zabno haroyo a esore d’Amerika krıkwi cami şıltonutho d’Boğdod u du qlimo d’Kurdistan du Iraq. U athro d’Amerika mawdacle dıgmalizi calu terkiwo da fulhonani dkito laşan dlobın darbo lhın gurube marıhbone dımxarbıti aqlimani du Iraq u d’Suriya.

Wi itawto tlithoyto di taşdarto d’MFS u du Huyodo Suroyo d’Amerika hawyo cami wazirutho du sutoro d’Amerika Pentagon . Bi itawtathe u mathlono d’Pentagon mıdle mawdconutho cala haylawotho du cameydan a haylawotho du Mawtbo Folhoyo Suryoyo u cala fulhone dkıtlın, u bebzabno mşayelın cali aykanoyutho d’QASAD d’MFS dkıtyo ha ma hayle mşatsone dida.

Bi itawtathe drışlınste aydarbo kibe mimodo i msaytrutho da fınyotho dkıtne adyoma a haylawotho da came msaytıre aclaye.

A itawyotho di taşdarto dı falqo mena mu garbyo u madınho d’Suriya dazayo l’Amerika gımdawmi ba yawmotho dıbqamutheyna.