Taşdarto mu gabo di Şawyutho udi Demoqratoyutho-DEM sımla socurutho la folitiqore dkıtne bu hbuşyo casyo d’Marmara

MARMARA, Turkiya – A rişone zawgoye d’DEM- Tülay Hatimoğulları u Tuncer Bakırhan, cam Mehmet Rüştü Tiryaki-u tahlufo da rişone zawgoye dcali mdabronutho Demoqratoyto da karxwotho sımlın athmıl socurwotho l’9 mşale u folitiqore frişe dkıtne bu hbuşyo d’Marmara u nqilın egartho du şlomo udi demoqratoyutho.

Beyn da 9 mşale, qoyume u folitiqore dlaqyo i taşdarto d’DEM kıtwo; u rişono catiqo di karxutho d’Stanbul-Ekrem İmamoğlu, u rişono zawgoyo catiqo di karxutho du Van-Bekir Kaya, u hiğmono d’Şişli-Resul Emrah Şahan, mşalo d’TİP u qoyumo d’Hatay-Can Atalay, folitiqore Halil Aksoy, Nesmi Aday uğer.

Bıthır ma ytawyotho dhawila i taşdarto d’DEM cama hbişoye, huwla maqırhonutho lu tbocofroso u Tunçer Bakırhan grışle u zuhoro calu qetro rabo da msokani da folitiqore b’Turkiya dlıkmisamme mahkamat kine u sımle qroyto, dmitaklın a msokani u dmisım bethdine dkıtne kine. Bakırhan mırle; Kıtlan sabro, dhozina cal qariwo maşqlo demoqratoyo u dkıtyo b’şlomo.

Bakırhan mawdacle da hbişoye kulle b’moral celoyo ubı hulmono towo’ne u walaw u maşıqlo da droşe du şlomo latne b’surhobo, naqla hreto hadire’ne dsundi u maşıqlano. Tülay Hatimoğulları’ste, nqila i egartho d’Ekrem İmamoğlu uda hbişoye hrene u mırla; İ frişutho lıkmaliqo l’Turkiya. Bkull duktho du athro dkito haşo, klozım dmicalıç u camhıdode kiban dfulhina leşan u şlomo bu athro-cal ucdo kıtlan gado makthabzabnoyo dmotina lu nişano.

Bu tarano’ste i taşdarto d’DEM huwla bu huthomo di maqırhonuthayda dlu tbocofroso şudoyo, dgımdawmo a esore wa fulhonayda leşan u bnoyo d’şlomo aminoyo la came mşahlıfe kulle dıkhoyın b’Turkiya.