Ted Cruz tlıble dmitahıt u gabo da Ahunone Maşılmone bi lohitho di marhıbonutho

U senator Qutnuthoyo d’Amerika Ted Cruz, ktolıb dmitahti u gabo dan Ahunone Maşılmone d’Mısır bi lohitho kımto d’Amerika, calu snodayde la marhıbone.

 Bebzabno u waziro di baroyutho du athro Mike Pompeo, kit dothe cal qariwo dmahıt a hayle da Houthiye d’Yemen bi lohitho di marhıbonutho.

 U senator d’Amerika Ted Cruz dkıtyo bi Sictho da esore baroye du senato, mqadamle adşabtho rmoyto leşan dmitahıt u gabo dan Ahunone Maşılmone bi lohitho di marhıbonutho. İ rmoytathe d’Cruz, mqadmo mşawtıfo me 3 senatore hrene Ron Johnson, Pat Roberts u Jim Inhofe. Bi rmoytathe kmıtlıb mi wazirutho di baroyutho d’Amerika, dmıstacmılo i mşaluthayda leşan dmahto u gabano xıd tukoso nuxroyo dkıtyo marhıbono.

Tlibste mi wazirutho di baroyutho d’Amerika dımqadmo taşroro li kongre du athro calan Ahunone Maşılmone kıcubri bu taro da kritere di marhıbonutho. Bi maqırhonutho di rmoytathe senator Ted Cruz mırle; Ono kıtli şubhoro dımqadamno i rmoytathe leşan u şuşoto du ağuno dkobo Amerika mqabıl da hayle marhıbone u da Maşılmone tuxmonoye.

Cruz mırleste; A hayle Caraboye dkıtne bnayqyomo d’Amerika, heş me zabno yarixo mahıtte an Ahunone Maşılmone bi lohithathe di marhıbonutho cala krize dıkxulqi bu Madınho Mescoyo u calathe klozım ahnaste dmahtina cayni klayto mqabıl dkull haylo dıksonıd i marhıbonutho. U gabano kıxolıq ruğzo mqabıl da Mşihoye, da Yudoye u da Maşılmone hrene u calovxa klozım dkurhina hawxa camle.

Me gabo hreno u waziro di baroyutho du athro Mike Pompeo, kit dothe adşabtho dmahıt a hayle da Houthiye d’Yemen, bi lohithathe di marhıbonutho. Woşington ğalabe naqlat grışwola u zuhoro du ğrubano, dmarhıq ruhe mu İran, dmakle a hjomayde calan athrawotho şbobe d’Yemen u dımqadım lu dialog leşan u şroyo du kriz du athro. U fusqonano dcala Houthiye ucdo bu yawmoyo du rişono Trumpyo.