Tlib mu Rişwazire dı Britania dsoyım hboso cal Anqara

Mşale da tukose du camo Armınoyo, Qufrusoyo, Kurdoyo u Mısroyo dıkhoyın b’Britania, mşadarlın egartho mşawtafto lu rişwazire Boris Johnson cali sbutho da dyoşe dıksaymo Turkiya bu yamo Mescoyo.

 Bi egarthathe a tukose da camani b’Britania tlıblın mu rişwazire Johnson, dsoyım hboso cal Anqara leşan dmakliyo a camle wa hawbe dıksaymo.

Bu taro di methcadronutho dkito bu haqlo di tagorutho beyn Britania u Turkiya, a rişone da tukose du camo Armınoyo, Qufrusoyo, Kurdoyo u Mısroyo dıkhoyın b’Britania, kthuwlın lu rişwazire du athro Boris Johnson u tlıblın mene dsoyım hboso cali şultonutho d’Turkiya dmatimo u qedomo wa fulhonayda du tehriwo di mşaynutho bu madınho du yamo Mescoyo.

An 4 camani dıhzelın şıkıl dhusrono mu qedomo qaşyo u mu cnufyo d’Turkiya, mawdaclın d’Ankara maqşela u haylayda bu madınho du yamo Mescoyo u gawonoyith bu qlimo. Turkiya kıxulqo lo thınihutho, kmahrıwo i mşalyutho ubu şıkılano, kmıxlıqste qento la yuthrone dkıtla Britania u la prensibe dkıtle u athro.

Bi egarthathe a rişone dan 4 came rızlın a camle wa dyoşe dıkmaşyo d’Turkiya; beynothaye u kboşo du yamo uda thume dan athrawotho du qlimo, u rişqutno Turkoyo kmıstacmıl retorik cjiqo u provokativ u kxolıq mwatyutho tawdithoyto u folitiqoyto, Turkiya kmahto a gelyunore wa folitiqore ba hbuşye u kıdayşo i hirutho du maftahfemo, ksundo a marhıbone, u kımnasyo dmawfıqo nafto u ğaz lo qonunoyo, kmıstacmılo a galwoye leşan a yuthronayda u ğer hawbe.

Amşale dımdelın tahte di egarthathe kımawdıciste, du rişwazire Britanoyo dlo mawrıx i aftho du zebono d’zayne l’Turkiya zayne dıkmıstacmılo b’Suriya. Mawdıcste d’Britania, klozım dımdawmo i ithuthayda bu yamo Mescoyo u d’Britania dmıstacmılo u dialog leşan dmihaşwo i şultonutho d’Turkiya ba hawbe dıksaymo. Britania dkıtla siyase tawto di baroyutho, u klozım dmıstacmılo i siyasathe leşan dmaklıyo u qedomano d’Turkiya bu yamo Mescoyo.