Tlib mu shutoso d’UNMAS dmandıf u athro du Iraq ma foqucotho talye

An athrawotho d’Beljika, İtalya u Slovakia mqadamlın mcadronutho lu tukoso d’UNMAS, leşan dmitandıf u Iraq ma foqucotho talye dkito bu athro.

 A şultonwotho da tlotho athrawothani, mqadamlın camhıdode 2.4 milyone dollare, leşan dmitahrıwi a foqucotho dmahtiwolın a ğrobe marhıbone d’Dacış bu Iraq.

U tukoso-The United Nations Mine Action Service (UNMAS)-awkith u tukoso Emwothoyo dcalu tehriwo da foqucotho, mqadamle a tahınyothayde li şultonutho d’Beljika, d’İtalya u Slovakia, cali mcadronutho dımqadamlalın leşan u tendifo du Cıraq ma foqucotho di arco.

Mawdıc di şultonutho d’Beljika mqadamla 1.6 milyone dolare. İtalya huwla 784 alfo dolare wi şultonutho d’Slovakia’ste huwla 18.750 dolare. A zuzani dfrişi li şatathe da 2020, gıdmitıstacmıli leşan u tehriwo da foqucotho, leşan u yulfono ulu teknik.

A fulhone du tehriwo da foqucotho, gıdmisomi ba dukotho dkıtwın bu duyoqo da marhıbone d’Dacış. A foqucothani dtlelın a marhıbone beyn da shifotho da bote, da bınyone uban arcotho, huwlın husrono rabo la mdinoye u kmınci u dcoro dhol 1.4 milyone dı galwoye la bote ula dukothathe.

Beljika mawdacla, bıthır mıd ğlibi a marhıbone d’Dacış bu Iraq ba 2017, mahwe u husrono dtrelın bıthraye u mahıt yuqro leşan u tendifo du athro ma foqucotho bnişo dmi’amno i mşaynutho du camo.

Bu snodano kubco Beljika’ste dmaydo i mşalutho dıknuflo acla u calathe mqadamla snodo l’UNMAS leşan u camo dı qodır docır la dukothayde. An athrawotho d’İtalya u Slovakia mahwelın cayni snodo leşan u Iraq dmitandıf kulonoyith ma foqucotho.