Tlotho came b’Australia sımme qreyto li şultonutho dlımstaqbılo u rişqutno Erdoğan lu athro

U camo d’Qufrus da Yawnoye dıkhoyın b’Australia, mhayadlın u qolathe camu talab dhawilın a Armınoye, Suryoye-Othuroye wa Yawnoye dkıtne bu athro bi sbutho di socurutho du rişqutno d’Turkiya l’Australia.

 Bi qroyto dsımlın a 3 camani dmafiti bu Sayfo dan 1915, tlıblın mi şultonutho d’Australia d’rıfıdo udlo maqıblo u renyo di socuruhathe du rişqutno Recep Tayyip Erdoğan l’Australia.

Bi maqırhonutho dıfrısle u camo di gozarto d’Qufrus da Yawnoye dıkhoyın ucdo b’Australia mawdaclın dıkımhaydi u qolathe camu talab dhawile u camo Armınoyo, Suryoyo Othuroyo u Yawnoyo dıkhoyın bu athro. Bi qroytathe da 3 camani dıkhoyın b’Australia, tlıblın mi şultonutho d’Canberra drıfdo u renyo di socuruho du rişqutno d’Turkiya Recep Tayyip Erdoğan l’Australia.

Bi maqırhonuthathe dfırsolın meqım şabtho a nubğe du qtolğenso dan 1915 dmahıtwo ışma; İnisyatif mşawtıfo di kinutho, mırwolın; Ahna mqabıl dkull nesyuno di şultonutho d’Ankara’na, dkubco dmıstacmılo a qabre mqadşe d’ANZAC dkıtne b’Galibolo xıd fırsa, leşan jubro aw dmaqnıco i şultonutho d’Australia bi kampanyayda du tenkiro du qtolğenso dsımla calan Armınoye, Suryoye-Othuroye u Yawnoye.

Bi maqırhonuthathe mawdıc dmatilın tebo, du rişqutno Turkoyo gıdsoyım 25 bu yarho d’Nison-bu yawmo şatonoyo d’ANZAC; awkith Australian and New Zealand Army Corps-dkıtyo yawmo du bıtlono b’Australia, Zelanda i Hathto, uğer gzıryotho hedor Australia, dıkmathkıri ebe a hayle dımharabwolın b’Galliboli 25 Nison dan 1915.

U rişono du federasyon du camo d’Qufrus b’Australia u Zelanda i Hathto Michael Christodoulou mırle; Erdoğan latle duktho b’Australia inaqla dıkmankır u qtolğenso u dıkmaşe siyase du kboşo d’Qufrus. İ hasinutho dhuwlın hın athrawotho l’Turkiya bi sbutho du qtolğenso, trelın d’Ankara dmıftakro dkiba kubşo Qufrus u naqla hreto dlo mihaşwo.

U komisyon Athronoyo dan Armınoye b’Australia bı fsihutho mıstaqbele u snodano du federasyon d’Qufrus u mırle; Meqım belhude şatowe, bıthır mu hçomo marhıbono dsımwo b’Christchurch, d’Erdoğan gzımwole dgımadcır a Australoye ucamo d’Zelanda i hathto dkızzın Galibolo leşan u duxrono d’ANZAC, ba nahşe xıdan abohothathe. Ucdoste kışumcina, d’Erdoğan hawroyo cama marhıbone u xlıqle athro du terror ba msoke, ba dyoşe uba rdufye dıksoyım bu athrayde.