Trump mawdacle; meqım mu cedo di qyamto u momuno docır lu kyoneyde

U rişono d’Amerika Donald Trump, mawdacle du momuno du athro klozım meqım mu cedo di Qyamto dıdocır lu kyonayde dmeqım.

Trump bu mamlo dsımle mawdacle da tedbire qaşye mqabıl du kewo di Corona, gıdhowın celtho du mawtbo d’olufe dıbnaynoşo.

U rişono d’Amerika Donald Trump camu grub dıknofıq mqabıl du kewo d’Corona, athmıl sımlın knuşyo lu tboco froso bu Qusro Heworo. Bu mamlayde Trump mawdacle dkobıc u momuno du athro dıdocır lu kyonayde meqım mu cedo rabo di Qyamto. Calu şuwolo dmıqqa klozım a’bnaynoşo dfayşi ba botaththe wa dukane dfayşi sxire, Trump mırle “klozım u athro dıdocır lu fulhonayde ukyonoyo, bıthır mi nyuhto du cedo di Qyamto awkith bıthır mu siqumo d’12 bu yarho d’Nison dıbqamuthayna”.

Trump dmawdacle dlaybe dhoze u momuno d’Amerika dımdawım dnofıl mfothıd di Corona, ba melani mdawamle “ba olufe d’farsufe kımvaycina kul şato mfothıd di raşha du grib, elo bi netije lıksıxrina u athro mi celtho du kewano. Ahna kımvaycina zıd mawxa b’ğalabe ba gedşe da radoyotho, elo lıkkımina la şırkat da radoyotho dlıkowe fayış dsıncitu radoyotho, mawxa klozım dıdıcrina lu fulhono. U camaydan kobıc dıdocır lu fulhono”.

Be bzabno, Trump mawdacle da qayde dmahti mqabıl du kewo d’Corona hawın celtho du sxoro d’şutose di tagorutho b’ğalabe dukotho b’Amerika, umedanoste kibe dmamte camruhe intihar awkith ba olufe d’farsufe kibe dqıtli ruhaye. Trump mırleste “a’qayde dmahtilan gıdhowın mahıştır mu qetro dıkcayşinale ucdo”.

U kewo d’Corona tafi l’zıd m’50 alfo farsufe b’Amerika, u qtile hul ucdo 660 farsufe, u hawi celtho du sxoro d’alfowat d’şırkat di tagorutho, uba malyune dıbnaynoşo hawın batile.