Trump u Alkazimi hawilın ytawto camhıdodhe

Bu zabno di socurutho dsımle u rişwazire du Iraq l’Woşington, hawile Mustafa al Kazimi ytawto camu rişono Amerikoyo Donald Trump bu Qusro Heworo.

 Bu zabno da droşe dhawın beyn d’Trump u al Kazimi, kıle cala esore dbeyn da tıre athrawotho dilonoyith bu haqlo du momuno. Mawdıc d’Boğdod u Wşington mşahlaflın u şıkıl da esorathe me esore du qrobo l’esore bu haqlo du momuno.

U rişwazire Iraqoyo Mustafa al Kazimi wu rişono Amerikoyo Donald Trump bıthır mi ytawto dhawilın athmıl bu Qusro Heworo, huwlın maqırhonutho lu tbocofroso u makadlın cali ulsoyutho du terkiwo da esorathe bu haqlo du momuno. Al Kazimi mırle; Amerika mcadarla u Iraq bu ğlobo mqabıl d’Dacış u bu tedriyo du diktatör Saddam Hussein. Wu ucdo kfulhina, leşan dmarkıwina esore qawye dkıtne calu asas da yuthrone da 2 athrawotho u calu asas da yuthrone momunoye du camo Iraqoyo bu dactith.

U rişono Amerikoyo Trumpste mırle; kımbaynina qyome ğalabe rabe du nafto wa şırak du nafto du Iraq u dı Amerika; beynothaye Chevron, kmodın qyome bu haqlano. Ahna ğalabe fsihoyena la esorani dkıtlan cam Boğdod. Al Kazimi mırle; İ şultonutho Iraqoyto hadırtoyo dmaqimo a qetre kulle, meqım mıd a şırak dmabdın a esorathe camhıdode. Tlıblanste snodo ma bankat d’Amerika leşan u şuşoto du sistem da bankat du Iraq.

Calu şwolo dımşayıl cala hjome dıkmisomi cala yuthrone d’Amerika bu Iraq ma hayle Şica dıkmısnodi mu İran, Trump makadle calu haylo da folhathe u mfanele; En noşo dmohe bahna, ahnaste hadirena dmohina heş qşeytır ebeye ahna latlan şwolo bi sbuthathe!. Bebzabno, Trump labıc dobe siqumo lu groşo da 5 alfo folhe dkıtte bu Iraq elo mfanele, dıgmıgroşi baroyo bıthır mıd kamıl u misyonathe.

Trump mawdacleste, en u rişwazire Iraqoyo dtolıb snodo me Amerika leşan dmitaklın ahjome d’Turkiya calu garbyo du Iraq, hadiroyo dorış u şwolo u d’sonıd u Iraq. Al Kazimi mfanele, d’qatciyan lıkmaqbıli ahjomani dıksaymo Turkiya cali moruthathe elo mawdacleste, dlıkmaqbıli dmisım hjome mu Iraq ban athrawotho şbobe.