Tukose u ğrobe da zedqe noşoye krıhlın a hawbe du qrobo dıkseymo Turkiya

Tukose u ğrobe frişe da zedqe noşoye, krıhlın a hawbe du qrobo dıksaymo Turkiya bu garbyo d’Suriya. Hol 18 tukose u ğrobe da zedqe noşoye frıslın egartho mşawtafto dımşadro lu bethdino da zedqe noşoye du Huyodo d’Urifi.

 Bi egarthathe, a tukose bşıkıl rwiho mathkarlın a hawbe wa dyoşe dıksaymo Turkiya wa ğrobe marhıbonayda bu garbyo d’Suriya.

Hol 18 tukose u şutose da zedqe noşoye bı britho, maslelın a hawbe du qrobo dıksaymo Turkiya bu garbyo d’Suriya. U krohano da tukose da zedqe noşoye mqadım bı egartho mşawtafto dımşadro la mşale du bethdino da zedqe noşoye du Huyodo d’Urifi u bşıkıl rwiho, mahke cala hawbe ucala dyoşe dıksaymo Turkiya wa marhıbonayda cala zedqe noşoye bu garbyo d’Suriya.

Bi egarthathe dımşadro lu rişono du bethdino Urifoyo Ragnar Spano uli notarozto gawonoyto du Mawtbo d’Urifi Marija Pejçinoviç Buriç mawdıc; Mu zabno d’Turkiya mabdela a cuqobayda a folhoye calu garbyo d’Suriya, mşahlıf u qlimano l’wahdo du dyoşo dkul zedqo noşoyo. Turkiya wa ğrobayda, kımaşın hawbe du qrobo, hawbe noşoye, hawbe du qşoco da came etnikoye u hawbe du qtolğenso.

Turkiya wa marhıbonayda mabdewolın a cuqobani calu garbyo d’Suriya bu yarho d’Nison da 2018 cal Cafrin, ubı Teşrin u qamoyo da 2019 u kbışwolın amdinotho d’Rişcayno, Tel Abyad uba mo alfayo d’mdinoye mgalwewolın ma dukothathe. Bu zabno du kboşanoste, manhıbi a mulkone da mdinoye, mawqıdi anarcothathe, htıflın u msıklın cılmoye u mahrawlın a qıryawotho, citotho u bethqbure da camani.