Tuma Çelik mqadamle rmoyto calu weyoco di eqartho Diril
U qoyumo du cameydan bu parlemento d’Turkiya Tuma Çelik, mqadamle rmoyto lu parlemento leşan dı gorış u zuhoro cali iqartho mvayacto du cameydan, dhawila 32 yawme dkıtyo msakarto.
U qoyumo bi rmoytathe dımşadrole li wazirutho di gawoytuho’ste grışle u zuhoro, cala farsufe du cameydan dı qtili ba şawciyat uba tmoniyat, me farsufe dlatyo i hiyuthathe idicto.
Bi rmoyto dımşadarle u qoyumo du cameydan bu parlamento d’Turkiya Tuma Çelik lu waziro di gawoyutho Sleyman Soylu dıkmahke cala rdufye wa qatle dhawın calu cameydan ba 70’yat uba 80’yat u tlıble mu parlamento umu waziro, dsaymi cuqobe tawtır leşan dmiqafyo i iqartho d’Diril-dkıtyo i emo u babo d’Abuna qaşişo Hermez Diril di cito Kaldoyto d’Stanbul.
Bi rmoyto Çelik komır; Lfuth a buhone dsimi bi şato dan 1998, 4 alfo dukotho kenşoye maxlın. Lfuth cayni buhone qtil 7 alfo bnaynoşo me farsufe dlatyo i hiyoyuthathe idicto, uba 90’yat mvayıc 1.352 farsufe ba hbuşye. U cameydan ha ma came dbi sagiyutho dım’athır mrimono ma gunhani’yo, ube bzabno dı qtil hol 50 farsufe mu cameydan, dholucdo lo msiki a hayobe ulo magle manwın bıthre da qatlani.
Tuma Çelik bi rmoytayde, ktolıb mu parlamento dımşatıs sicto dsaymo buhono bi qameyto calu veyoco di iqartho d’be Diril u bıthır cala hawbe dsimi mqabıl du cameydan. U qoyumo du cameydan Çelik bi rmoytayde dıkgorış u zuhoro cali aykanutho casqo du cameydan, kıtolıb di şultonutho dnıfqo moro lu cameydan dıkmi’athır lo towo ma sebwothani.