Turkiya heş kımdawmo demşayco çatawiye lu athro d’Libya

Turkiya kımdawmo dımşadro a’çatawiye d’Suriya lu athro d’Libya, laşan dmıştawtıfi lu qrobo mqabıl du gayso athronoyo d’Libya dkımrayşanle rabhaylawotho Xalifa Haftar.

Lfuth i mşatasto d’Suriya da zedqe noşoye, u menyono da çatawiye d’Suriya dıqtili bu athro d’Libya mati l’190 farsufe.

İ mşatasto d’Suriya da zedqe noşoye mawdacla dı Turkiya nqila grub hatho dıkmişakıl m’casrowat da çatawiye d’Suriya lu athro d’Libya, laşan dmıştawtıfi lu qrobo cami şultonutho athronoyto d’Alwifaq dkımrayşanla Fayez Alsarraj mqabıl du gayso athronoyo d’Libya dkımrayşanle rabhaylawotho Xalifa Haftar.

A’taxtuşe qaşye heş kımdawmi bayn da tıre gabe b’gbine mşahılfe du qrobo b’gawıd da narcotho d’Libya. Ubi sbuthathe, i mşatasto d’Suriya da zedqe noşoye makadla u qatlo d’8 çatawiye Suriye, ubu şıkılano u menyono da çatawiye dıqtili hul ucdo ba taxtuşe dhawın b’Libya mati l’190 farsufe. Bebzabno, u gayso d’Libya msıkle hamşo ma çatawiye d’Suriya ba şoce dşaficina.

Meqım kımo yawme, i mşatasto d’Suriya da zedqe noşoye mawdacwola d’150 farsufe ma çatawiye d’Suriya du grub d’Alsultan Murad, nqıliwo bı base Turkoye mi mditho d’Cafrin hol lu thumo dcam Turkiya, ubebzabno grube hrene nqıliwo ma mdinotho d’Jarablos u Albab li nuqazto du kunoşo dkıtyo bi fnitho d’Hawar Kilis bi mditho d’Czaz bu garbiyo d’Suriya. U yawme d’cruto dşaficina hedor 300 çatawiye Suriye mu grub d’Alsultan Murad, Sıqur Alşamal u Faylaq Alşam matınwo lı athro d’Libya bu darbo dı Turkiya. Ubu şıkılano u menyono da çatawiye Suriye dımşadri l’Libya mati hul ucdo l’hedor 5050 farsufe, wu menyono da çatawiye dımşadri la maşıryotho Turkoye laşan dqathlın duroşo mati l’hedor 1950 farsufe.