Turkiya kdeyşo u qonuno emwothoyo bu athro d’Libya

U athro da İmarat Caraboye Mhayde mawdacle du mede dıksaymole Turkiya bu athro d’Libya dyoşo qrihoyo calu qonuno emwothoyo.

 Camgabıdathe, u gayso athronoyo d’Libya mawdacle dı Turkiya heş kımdawmo bu şedoro d’zayne u radoyotho folhoye li şultonutho dı Trablos dkımrayşanla Fayez Alsarraj.

U athro da İmarat Caraboye Mhayde mawdacle du mathlono di şultonutho d’Aliwifaq d’Libya b’Emwotho Mhaydotho, ba maqırhınwotho dkobe lu tboco kobıc dımkase afulhone du qento dıksaymolın Turkiya bu athro d’Libya.

U athro da İmarat bi egartho dımşadarle lu mawtbo di mşaynutho d’Emwotho Mhaydotho, mawdacle du mede dıksaymole Turkiya bu athro d’Libya dyoşo lu qonuno emwothoyoyo. Bebzabno, u athro da İmarat makadle dıksonıd u şroyo folitiqoyo mşayno b’Libya, u mawdacle di mudaxala folhoyto Turkoyto b’Libya maqşela zıd u kriz noşoyo bgawıd du athrano. Callathe, u athro da İmarat makadle dıklozım dmitafiti la haye afusqone dımbayniwo bu qyomo d’Berlin calu kriz d’Libya.

Camgabıdathe, u gayso athronoyo d’Libya mawdacle dıhdo sfintho Turkoyto du import matcanla radoyotho folhoye dmawbıli lu lmino d’Misrata d’Libya, laşan dsındi i şultonutho dı Trablos dkımrayşanla Fayez Alsarraj. U malolo du gayso athronoyo d’Libya Ahmad Almismari mawdacle di sfitho Turkoyto matcıno tanqat M-60, ube bzabno sfinotho hrene Turkoye du qrobo şafici li harake bi fnitho dkıtyo qaruto l’Misrata.

Mxasra hreto, fris bu nawlo u qolo dıha ma jatawiye Turkoye dıkmıştawtıf lu qrobo b’Libya mqabıl du gayso athronoyo d’Libya Xalifa Haftar. Bu qolano dıfris, u jata dı Turkiya dkıtyo mu grub d’Alhamzat, ksoyım qroyto la gelyunore dmaxılsi a’Suriye dımşadri l’Libya udıkmıştawtıfi ucdo lu qrobo bu taymno dı Tarablos.

Camgabıdathe, u jatano mawdacle dı Turkiya gahixo aclaye cal dkıtlın qyomo dmıştawtıfi lu qrobo balhude tlotho yarhe, elo hawilın ışto yarhe, ube bzabno Turkiya lıkobolın anağrathe awkith amcaşe dkul yarho wu menyono da qtiloye du grubathe kul yawmo kzoyıd.