Urişwazire du Iraq manqasle a mcaşe da rişone di şıltonutho

U rişwazire du athro du Iraq Mustafa Alkazımmi kımdawım ba şuhlofe mawthrone du athro dıksoyım. Bi mawdconutho dhule mawdacle dmıdlın fusqono dımanıqsi a zuze da mcaşat da rişone u da cawode di şıltonutho du rişqutnutho.

Alkazımi bi maqırhonutho dıfrısle mırle ahna layban mcadlina u ekonomi du athro calu hşowo da cawode u da farsufe dkıtlın mkone dı macişi a yaqrothathe, mawxa mıdlan fusqono dımanıqsina a mcaşat druheyna dkıtna bi rişonutho du athro awkith amcaşat da mşale u rişone di rişqunutho u di rişwazirutho kule.

Alkazımi mu zabno dkıtwe mraşho mırwole ahna gıdhowelan ağuno qaşyo mqabıl da marıhbone du fasad du gnowo, u bebzabno gımşaylina cali aykanoyutho da mtagılyone u hani dkıtne ba hbuşye dmıştawtaflın la tagılyotho mitarfın hire.

Hul ucdo u rişwazire Alkazımi mşarele ğalabe ma fulhonani xıd u ağuno dımqabıl da marıhbone. Udhule amro dmiqafın a mtagılyone dkıtne mwayce u dkıtne ba hbuşye, ucdoste bu fusqono dhule dımanhıt u mcaş druhe u da mşale di şıltonutho laşan qotıc qumud du fasad wu muklo da zuze du athro.