Turkiya kımdawmo dmaqwiyo u haylayda b’İdlıb

Hawi athmıl furqoco bu zabno du duyoqo dsımla dawriye Rusoyto – Turkoyto bi fnitho d’İdlıb bu garbay macırbo d’Suriya.

Be bzabno, Turkiya dkımdawmo dmaqwiyo b’Suriya, mati u menyono da radoyotho folhoye dımşadrila hul ucdo li fnitho d’İdlıb l’zıd m’6620 radoyotho.

Athmıl safrayto dawriya hathto folhoyto Rusoyto – Turkoyto sımla cuqobe mşawtıfe du duyoqo calu darbo emwothoyo dbayn di Latqiye u Hlob, u mşarela u duyoqayda mi qritho dı Tırnabe hedor di mditho d’Saraqeb hul dmatyo li mditho d’Ariha bu taymno d’İdlıb. Bu zabno dmatyo i dawriye l’Ariha şmic qolo d’furqoco dımharhazle i fnitho, ube bzabno layım bi duktho ba casrowat dımtagılyone dıkrıfdi u qyomo dhawi bayn Rusya u Turkiya cali sbutho d’İdlıb.

İ dawriyathe i Rusoyto – Turkoyto lıkmıhşowo i dawriye da casro dıksaymo duyoqo bu darbo emwothoyo d’M4.

Be bzabno, u gayso kaboşo dı Turkiya kımdawım dımşadır mcadronwotho folhoye, lojistik u radoyotho uba olufe d’folhe la nuqazyotho du duyoqo dkıtla Turkiya bu garbay macırbo d’Suriya. Lfuth i mşatasto d’Suriya da zedqe noşoye, Turkiya mşadarla athmıl konvoy folhoyo hatho dıkmişakıl m’35 radoyotho u kamyone matcıne mcadronutho folhoyto, lojestik u nafto. U konvoy dşafıc la n’arcotho d’Suriya bu darbo di nuqazto d’Kafarlusin, maftele fothe lafa nuqazyotho du duyoqo dkıtle u gayso Turkoyo bi fnitho d’İdlıb.

Mu siqumo d’02 bu yarho d’Şbot dşaficina uhul ucdo, u menyono da radoyotho folhoye uda kamyone di mcadronutho dımşadrila Turkiya li fnitho d’İdlıb ula fenyotho kbişe hedor d’Hlob, mati l’zıd m’6620 radoyotho. Wu menyono da folhe Turkoye dıfrisi ba fenyothani mati l’zıd m’10 alfo u 300 folhe.

M’gabo hreno, i dafo Amerikoyto d’Monitor mawdacla dı Turkiya cajıztoyo mu diyalog di awyutho Kurdoyo – Kurdoyo dıkmisım b’Suriya bu snodo d’Amerika. Be bzabno, Monitor mawdaclaste şultonutho dı Turkiya hjımla calu athro dı Fransa cal dıksonıd aytawyotho du şlomo bayn da gabe Kurdoye d’Suriya, bnişo dmiqafe şroyo kamilo lu kriz d’Suriya ulu dactidayda. İ dafo mawdaclaste dı Turkiya hjımla calu rişono du qlimo d’Kurdistan du Iraq Neçirvan Barzani, cal dhewile teklif m’Amerika umı Fransa dmanhıt i tahrazto dkıtlın b’Suriya. Mawxaste Turkiya dıkzayco ma şuşote dkowın bu garbay madınho d’Suriya, kmazido u haylayda bi fnitho d’İdlıb laşan dhuyo warqo bidotha la bazare dıcal Suriya.