Turkiya kseymo cuqobe hathe calu gerilla di PKK b’Nuhadra

A tayosyotho da hayle kaboşe d’Turkiya, sımlın cuqobe hathe calu gerilla di PKK bi hiğmonutho d’Nuhadra bu garbyo du Iraq.

Bebzabno, mınyono celoyo ma comure d’Nuhadra, sımlın taglitho du protesto mqabıl da hçomani d’Turkiya udi aykanoyutho harıwto di ciyeşe bi hiğmonutho.

Lfuth dafe frişe du qlimo d’Kurdistan du garbyo du Iraq, tayosyotho da hayle kaboşe d’Turkiya sımlın athmıl naqla hreto cuqobe calu gerilla di PKK b’Nuhadra. Lfuth a dafe du nawlo du qlimo, ba cuqobani’ste heş latyo idico en qtil aw mçarıh mınyono d’Mharbone.

A mşale di hiğmonutho mawdaclın ilo thnihuthathe calu qrobano dıkmdawım beyn d’Turkiya udi PKK ban arcotho du qlimo wu husrono rabo dıktore u simste qroyto l’Ankara, dmarhıqo u qrobano ma qıryawotho uma dukotho dıkhoyın a mdinoye u dnuqlo u qrobano lıgawe da thumayda. Bu zabno dıkmdawım u qrobo, kmitahıt’ste foqucotho bi arco dkobın husrono la comure ula haywotho da qıryawotho frişe du qlimo.

Cali aykanoyuthathe’ste, a comure dhol 10 qıryawotho d’Nuhadra mıştawtaflın li taglitho dsimi b’Kalak. Bi taglithathe a comure sımlın protesto a hçomani d’Turkiya qariwo la qıryawothathe. Amtagliyone, mawdaclın ilo thnihuthathe cali bsirutho da sniqwotho kenşoye dilonoyith u cedolo da darbone.

U camo tlıble mi şultonutho du qlimo, dmabdıyo tarmıyotho lu bnoyo du bınyono tahtoyto. Elo me darbe dmisanıt cala talabani du camo, Arbil mşadarla hayle di mşaynutho leşan dımbarbızi a mtagliyone mi duktho. i claymutho dmıştawtafla li taglitho mırla; İ şultonuthathe d’Arbil, layba dımsafyo mede u loste d’şuryo a qetre du camo.