Turkiya maqşela a cuqobayda di naşfe udi hawa cal dukotho frişe d’Nuhadra bu garbyo du Cıraq, bu zabno du gerilla di PKK kımtayıb ruhe dtore mu zaynayde

A hayle kaboşe d’Turkiya, sımlın ba yawme haroyani ba mowat d’hçome cala dukotho du gerilla di PKK bu garbyo du Cıraq. A cuqobani du gayso Turkoyo dıkmisomo hem mi naşfe u hemste mi hawa, kıjobır u gerilla’ste dımhame u dımdafıc ruhe. Bıthır mi egartho du rişono Kurdoyo Abdullah Öcalan leşan dmifıt l’maşıqlo du şlomo cami şultonutho d’Turkiya, i PKK’ste sımwola ha bu yarho d’Odor iclan şalyuthzayno.

Uba yawmotho dşafıcina’ste, sımwole u gerilla u lumodayde da 12 leşan dımtayıb ruhe li tahrazto du rişonayde Öcalan u dtore mu zayno u dmışre xıd haylo folhoyo. Elo Turkiya kımdawmo ba cuqobani dcalu gerilla bu garbyo du Cıraq u lfuth u hşwolo di PKK, bu yarho d’Odor sımwola Turkiya 11 alfo 585 cuqobe oyaroye udi naşfe.

Bu yarho d’Nison’ste, nafıl mınyono d’Mharbone Sohde bu garbyo du Cıraq  bıthır mu hçomo dsımwola Turkiya cal dukotho frişe du qlimo. Mu şuroyo du yarhano d’İyor u hol athmıl’ste, mdawmiwo a hçomano da Turkoye calu gerilla. Me 7 uhol 10 bu yarhano, sımlın a folhe 541 hçome b’zayne yaqure uba hçome da tayosyotho dlo pilote cali PKK. Wa cuqobani d’Turkiya kmisomi bu zabno dıknutro i maqırhonutho du lumodo dımtayable u gerilla.

Bu mamlo dsımle athmıl u rişqutno Turkoyo Erdoğan dmawdacle, d’Ankara b’fusqono kamilo’yo dmatimo a mabuce di marhıbonutho u mırle; Ahna gıdmdawmina dımhafdina u athraydan dfayıt b’haşo rabo hani 40 eşne. Erdoğan d’mwacadle dgıdowe cal qariwo şuşoto rabo bu athro bıthır mu lumodo di PKK mırle’ste; Cal qariwo gıdmotalxu tebe basime. Elo bu mamlo dsımle u waziro di baroyutho Hakan Fidan’ste mırle; İ PKK belhude dmaslımo u zaynayda, latyo makfıyono.