Turkiya tlıbla sistem du Patriot me Amerika

U rişono Amerikoyo Donald Trump wu baramnayde u Turkoyo Recep Tayyip Erdoğan, kıdorşi u talab dkıtla Ankara me Woşington-bnişo dmitahwelın sistem d’Patriot leşan dmarkıwile cala thumathe dcam Suriya.

 Bezabno u rişqutno Turkoyo mawdeleste bu mamlayde dcam Trump, dkubci kıbşi dukotho d’Suriya u dlatte ucdo niye dnufqi mu athro.

U şuşotano athi lu huwoyo, mcal fothe dhariwo i aykanoyutho bu qlimo d’İdlıb d’Suriya, bıthır mıd 36 folhe Turkoye qtiliwo bı cuqobo oyaroyo dsımwo aclaye yawme d’Hamşo dı şafıcina. U rişqutno d’Turkiya kıtohum Rusya bu hjomano dsim aclaye b’İdlıb.

Calathe u rişono Amerikoyo Donald Trump athmıl mawdacle, dmabdelın droşe cam Turkiya calu talab dhawila Ankara menaye, leşan dmitahwelın system d’Patriot-dkıtyo leşan u sutoro da thume oyaroye.Trump mırle; Kmıjğolina ğalabe camu rişqutno Erdoğan. Kmıjğolina acme calu talabano dhawile menayna bi sbutho du sistem du Patriot. U sistemano, kmibıc dmitarkıw cala thume dbeyn Turkiya u Suriya.

Athmıl bimomoste mawdacwole u waziro di baroyutho d’Turkiya Mevlüt Çavuşoğlu dkıtte sniqutho rabtho l’sistem du Patriot u tlıbwole me Amerika dımşadrole lu taymno d’Turkiya. Camatheste tlıbwole man athrawotho hadome du NATO, dımcadri Turkiya bu sutoro da thume ubu haqlo da istixbarat b’İdlıb.

Me gabo hreno, u rişqutno Turkoyo bu mamlayde dcam Trump mawdacle, dkıbci dkubşi dukotho d’Suriya ubu mamlo dhawile bu knuşyo du gabayde mırle; Ahna latlan niye dmıgroşina me Suriya-hol du camo d’Suriya domır basyo li ithuthaydan bu athro.

Elo calu kboşano d’Turkiya calan arcotho d’Suriya, u mathlono dilonoyo d’Suriya b’Emwotho Mhaydotho Başar al Jacfari sımle qroyto dmitaklın a gzome du rejim d’Turkiya cal Suriya-dkıtne qento li mşaynutho ulu şlomo Emwothoyo. Al Jacfari m’akadleste, dgımdawmi dobın funoyo la hçomani dıksaymo Turkiya aclaye.