U athro du Iraq tlıble snodo mu NATO mqabıl Dacış

U Iraq tlıble snodo mu NATO, bu ağono dkobe mqabıl da ğrobe marhıbone d’Dacış.

 Bebzabno, bu taro du snodo dkobe u koalisyon Emwothoyo lu qlimo d’Kurdistan, mşadarla Hollanda 150 folhe hrene lu qlimo, leşan dım’amni i mşaynutho du bethtawso Emwothoyo d’Arbil.

U mşawrono di Mşaynutho Athronoyto du Iraq Qasım al Caraji makadle cali ulsoyutho du NATO, bu ağono dkobe u athrayde mqabıl da ğrobe marhıbone d’Dacış u mawdacle, du Iraq hadiroyo li methcadronutho camu NATO bnişo dmıstafdi a hayle Iraqoye ma nesyunayde bu haqlano.

Al Araji bıthır mi ytawto dhawile camu mathlono du NATO bu Iraq Pierre Olsen mırle; U Iraq lıkmoyıd duktho b’ayya qetro dkowe bu qlimo elo kobıc dmoyıd duktho bu şroyo da qetre. Olsenste m’akadle, du NATO gıdsonıd u Iraq bu darbo di methcadronutho dgıduwyo cami şultonutho d’Boğdod.

Bıthır ma hçome dsimiwo calu bethtawso Emwothoyo d’Arbil, u NATO m’akadwole dgımaqwın i ithuthathe bu Iraq wu Hollanda dkıtyo hadımto bu koalisyon Emwothoyo dkıtyo bi rişonutho d’Amerika, mşadarla 150 folhe lu qlimo d’Kurdistan, bnişo dmisım u duyoqo du bethtawso.

A folhani, gıdfayşi b’Arbil ucdo bu noquso şato wu meqım’ste mdarşiwo a folhe Hollandoye a hayle di peşmerge udu gayso Iraqoyo. Me gabo hreno mawdıc, bi sbutho du ağonano dıkmitahwe mqabıl da marhıbone d’Dacış, ba cuqobe dsımlın a hayle di mşaynutho du Iraq b’Dawood Aloka, mahıtte ido cal 20 foqucotho da marhıbone bu qlimo d’Kerxeslox.