U babo d’hasyo Matta Rohom Mhase bu Swed

Şamoşo Cabdılahad Musa Rohom dkıtyo u babo di mcalyutho du hasyo Mor Ostathawos Matta Rohom, nqil ma hayani a’zabnoye b’cımrıd 95 ışne.

Mnoho şamoşo Cabdılmasih Rohom, dkıtwe idico bi haymonutho ubi taybutho lebonoyto, mi celtho du kewo d’Corona, athmıl bi mditho d’Södertelje bu Swed macmasle caynothe mıbrithathe.

Bı mahişonutho rabtho, i mcalyutho du hasyo Mor Ostathawos Matta Rohom frısle egartho d’buyoye calu husoyo du babo şamoşo Cabdılahad Musa Rohom dınqil ma hayani ha bu yarhano d’İyor bi bethkrihe d’Södertelje bu athro du Swed bıthır mıkmo yawme mıdtafile u virus d’Corona.

Mnoho şamoşo Cabdılahad Rohom, mawladwo bi şato da da na’1925, umi nucmuthayde i hubo d’Aloho udi cito lıfrişo mene. U mhasyo bu şuroyo da hamşiyat du doro dşaficina mzawağwole a’hayayde cami mnohto Albera Basmaji dınqilowa ma hayani i şato da 2011 bcımrıd d’78 ışne. Mu zuwoğano Aloho hulelın şawco nacime hamşo abne u tarte bnotho dkıtne (Cadıl, hasyo Matta Rohom dkıtwe u rişono di marcitho di Gozarto udı Froth udsımwole mşablonutho u tarmiyotho li marcitho l’zabno d’zıd m’20 ışne, Cammanuel, Gawiryos, Aframyos, Julyana u Zahra).

Be bzabno, u mhasyo şamoşo Cabdılahad kıtle tarte bnotho Mari u Fawziye mi bethzawgayde i qadmoyto mhasayto Şmuni. U mhasyo flıhwole bi dayira du momuno di mditho di Qamışli l’ışne yarixe hul dmatiwo lu cumro di mşawtbonutho. Bu zabno du fulhonayde b’şarirutho mşabewole u camo wu athro dılo furşono, ukşorewo a’qetre dkıtwın casye, u mawxaste kmiqadamwole b’iqoro mu camo. Camgabıd du fulhonayde flıhwoleste xıd hoşubo l’zıd m’30 ışne bi knuşto d’Mor Mansur di mcadronutho. Bu zabnano u mhasyo ksamwo socurwotho la faqire ukımfaraqwo aclaye mcadrınwotho.

Mhasyo Cabdılmasih Rohom mgalwewole cami iqarthayde lu athro du Swed i şato da na’1989, ubi goluthayde sımwole mşamşonutho da citotho kulle dlo furşono di mditho d’Södertalje.

Mhasyo şamoşo Cabdılmasih Musa Rohom gabro di citowe, rohumo du camo we, u lebe malyo we taybutho.