U camaydan d’Fransa mcayadle Ha Nison
U camaydan di cito Kaldoyto dıkhoye bi mditho d’Paris bu athro d’Fransa, mcayadle i rişıdşato umthoyto d’Akitu da n’6772. Li hfitutho catırto dımtaybole u Huyodo da Kaldoye dı Fransa bı Paris, mıştawtafle mşale mu Huyodo Suroyo d’Urifi ESU.
Tre bu yarhano d’Nison, u Huyodo u Federasyon da Kaldoye dı Fransa mtayable hfitutho rabtho bi mditho d’Paris, bi cohnutho di rişıdşato umthoyto Suryoyto Bıbloyto Othuroyto d’Akitu da n’6772. Li hfituthathe mıştawtafla i rişonitho zawgoyto du Huyodo Suroyo d’Urifi ESU Alicia İşık, kohne Franşoye, u rişono du Huyodo Kaldoyo Josef Yalap, mathlone d’şutose u huyode Armınoye u Yudoye u menyono celoyo mu camaydan di marcitho Kaldoyto d’Paris. Camgabıdathe, li hfituthathe ste mıştawtafle mathlone d’gabe folitiqoye, rişone d’karxıwotho u menyono d’senatore bu parlamento d’Paris.
Bi hfituthathe dkıtwo eba zmoro u raqdo marduthoyo du camaydan cam muklo u ştoyo, sim ste mamlo mu kohno di cito Franşoyto xuroyo Golniş dkıtyo idico bi mcadronuthayde la Mşihoye du madınho, dilonoyith lu camaydan d’Suriya udu Ciraq dıkbişiwo a’fenyothaththe mu tukoso marıhbono dı Dacış. Xuroyo Golniş bu mamlayde mqadamle tahanyotho lebonoye lu camaydan u Suryoyo Kaldoyo Othuroyo dı Fransa bu cedo di rişıdşato hathto d’Akitu, u mahwele sabro du cedano dmamte camruhe burkotho u hubo u şalyutho lıbritho.
Bıthır mathe, u rişono du huyodo da Kaldoye Josef Yalap bu mamlo dsımle huwweste mhanele u camaydan bi cohnutho d’Akitu, u makadle i ulsoyutho dmitacişi a’cede umthoye u marduthoye du camaydan bi golutho. Bi hfituthathe ste, mqadım raqde camonoye du folklor Armınoyo mıhdo gudo dmıştawtafla lu hagano.
Putin hule şudoyo dgımdawım u fulhonayde leşan u sutoro da Mşihoye bu Madınho
U rişono d’Rusya Vlademir Putin bi maqırhonutho dhule lu tbocofroso, makadle dkobıc dımdawım bu …
