U camaydan du Ciraq simle u rişwazire Mustafa Alkadhimi sturyo qaşyo

Barmothoye mu camaydan du Ciraq ba maqırhınwotho dıfrıslın ba dafe kenşoye du nawlo, sımlın sturyo qaşyo a’tahanyotho di şultonutho du athro dilonoyith du rişwazire Mustafa Alkadhimi dımqadmi bi cohnutho du cedo di Qyamto. An’abne du camaydan mawdaclın da tahanyothani balhude şufro di fothoyo, elo lıkmanqısi i dişutho wi tuhmonoyutho dkito calu camaydan ba şutose rişmoye du Ciraq.

Hın ma n’abne du camaydan dıfrıslın ba dafaththe a’tahanyotho du cedo di Qyamto dıfrısile Alkadhimi bi dafayde du Twitter, mawdaclın ste di tuhmonoyutho Maşılmonitho mahwela i surto cjıqto rabtho dkulle bu yarhano du ramadan dilonoyith bi sbutho du tecjizo da Mşihoye ba madraşyotho uba şutose du athro bi dacwa du sawmo.

Camgabıdathe, barmothoye hrene mu camaydan ba maqırhınwotho dıfrıslın mawdaclın di sagiyutho da şutose du Ciraq kımdawmi dımqadmi b’tuhmonoyutho da mathhabe la Mşihoye du athro, u grışlın ste u zuhoro cala woliyotho di mdabronutho dıkmitahwın l’farsufe Maşılmone dlatlın a’mkone wu yulfono dıkşowın lu darğano, elo a’Mşihoye dıkşowın kmitarhıqi ma woliyothani bnişo dmıçbori dıtorın udımgalwın mu athraththe mu Ciraq.

Mxasra hreto, barmothoye mu camaydan di mditho d’Mawsal grışlın u zuhoro cali dayro makthabzabnoyto d’Mor Mixael di aykanoyuthayda dlatyo tawto bıthır mıdnafqiwo an’abne di cito Kaldoyto mı Mawsal heş meqım mu nfolayda bidothıd dı tukoso marıhbono dı Dacış. Hın ma socure di dayro d’Mor Mixael makadlın du cajaq da tırtotho kmahwe bkul duktho cal da rucye kmarcanwo a’haywothaththe b’gawıd di dayrathe dıkdocır u makthabzabnayda lu doro da n’ışto dbıthır mı Mşiho, uknıflo bi mditho catqıto d’Mawsal b’ruhqo d’ışto kilomıtre mu qentrun di mditho.