U rişono da Sabiaa Mandoye krihle a’hçome dıksaymolın Turkiya calu garbiyo du Ciraq

U rişono di qalilutho da Sabiaa Mandoye du Ciraq Sattar Jabbar Hılu, bi maqırhonutho dhule lu tboco froso, mawdacle da hçome dıksaymolın Turkiya calu garbiyo du Ciraq mede dlıkmitaqbıl yo, u mırle “bu zabno dıkrıfdina a’cuqobe folhoye dı Turkiya b’gawıd da n’arcotho du Ciraq, kımakdina ste dıklozım dmitaqwın an’esore msimone cam Turkiya calu asas da yuthrone mşawtfe bayn da tre athrawotho, udmışre u kriz di mşaynutho bu darbo di methcadronutho udi sdirutho mşawtafto, uklozım ste dmitahwe iqoro li morutho du Ciraq”.

Bebzabno, u rişono da Sabiaa Mandoye rfıdle dhowe u cafro du Ciraq wahdo la qrobe ulu myodo da hşowe, u makadle ste dıklozım dmıgroşi a’haylawotho Turkoye ma n’arcotho kulle du Ciraq, u hawxa mdawamle “Turkiya klozım dgırşo a’haylawothayda b’şıkıl dıkmahwe iqoro li morutho athronoyto du Ciraq, cal da fulhonani a’bceldboboye dıkmisomi lıkxılqi arcutho dıkşuyo lu şroyo da qetre di mşaynutho bayn da tre athrawotho”.

Şex Sattar Jabbar Hılu makadle ste du Ciraq kıtle u zedqo qonunoyo dmoyıd a’tedbire dıklızmi kfuth a’qyome d’Emwotho Mhaydotho, mqabıl da hçome bceldboboye dı Turkiya dlıkmahti bolo lu prensib du qedomo towo bayn da n’athrawotho şbobe.