23/09/2021

U camaydan u Othuroyo dıkhoye b’Armenia sımle protesto u plan du şuhlofo demoğrafoyo dıkmibıc dmisım bu qlimo dıkhoyın

U camaydan u Othuroyo dıkhoye bhdo ma qıryawotho d’Armenia, sımle protesto u plan du şuhlofo demoğrafoyo dıkmibıc dmisım bu qlimo dıkhoyın.

Bi taglitho dsim qum du parlamento d’Armenia, u camaydan dıkhoye bi qritho d’Dimitrov, grışlın u zuhoro calu qento dkito calu leşono ucali marduthathe-en dothe dmitawrıwo i qrithathe.

İ qritho catıqto d’Dimitrov b’Armenia hawila 200 eşne wi sagiyoyutho da comure di qrithathe, man abne du camaydan u Othuroyo’ne. Meqım zabno mqadamwo renyo l’şuhlofo du qonuno leşan dmıbno’yo u dmişawşıto i qrithathe u dmitahwe aftho dcobarla ğer bnaynoşo.Elo a comure di qrithathe, latne thnihoye calu planano u tlıbbe ucdo dmıdrış u şuhlofo du qonunano me hatho.

Calathe an abne du camaydan di qritho, layimi athmıl qum du bınyono du parlamento u mqadamlın u talabathe u lo dmıblış bi qrithathe. Bi taglithathe u camaydan di qritho d’Dimitrov mırlın; Dothe dmişahlıfo i qrithaydan kito qento dmıqşıc u leşonaydan wi marduthaydan. Calathe lo kubcina dmisım şuhlofo demoğrafoyo bi fnithaydan wi şultonutho klozım dımşahlıfo u renyo du şuhlofo du qonunano.

Lfuth a qonune d’Armenia’ste, a qıryawotho dkıtne a comurathe me qalılto athronoyto, lıkowe dmişahlıfi u dmitawrıwi. Elo naqla hreto, kubci a mşale di fnitho dımhaydi i qritho d’Dimitrov cami fnitho d’Artaşat dıkmişaklo me 40 qıryawotho.

İ mgabayto di qritho İrina Sahradova-Gasparyan mırla; Hıwo şudoyo la comure, di qrithaydan lıgmitawrıwo, elo bu mamlo dsim bu parlamento u waziro du bnoyo udu hethotho mdacele, du camaydan belhude kımşakıl 14 ba mo da comure. Hano latyo şroro. En dothe i qrithaydan dmihaydo cami fnithathe, man gıdmşayıl calu camaydan?