U camo d’Amerika heş bqaşyutho kımdawım a protestowiyeyde

U camo d’Amerika b’qaşyutho heş kımdawım u hfuxyayde mqabıl du qatlo du gabro George Floyd dkıtyo bu şerşo m’Afriqya.

 Bebzabno, u Pentagon nqile 1600 folhe Amerikoye li mditho d’Waşington laşan dnıfqi moro li mşaynutho di mditho.

 Adyawmaste bımdinotho u qlime mşahılfe d’Amerika, mdawamlın atagılyotho du protesto calu qatlo du barmothoyo Amerikoyo dkıtyo bu şerşo m’Amerika George Floyd.

Atagılyothani mbarbızi hul ucdo b’zıd m’100 mdinotho b’35 qlime mşahılfe d’Amerika. Wu rişono du athro Donald Trump sımle qroyto dmimıd tedbire folhoye, u mhadadle dgıdmanhıt ahaylawotho du gayso la mdinotho laşan dnıfqi mqabıl du cnufyo udu tehriwo dkowe, u mırle “a’haylawotho Amerikoye klozım dnıhti la zabuqone di mditho d’Newyork”.

Camgabıdathe, i wazirutho du sutoro d’Amerika u Pentagon mawdacla dınqila hul 1600 folhe li erişkoyto d’Waşington, u malolo du Pentagon Yonathan Hofman bu buyono dıfrısle mırle “a’haylawotho hadirene ucdo b’darğo celoyo, elo lıkmıştawtıfi lu snodo da haylawotho mdinoye dkımdafci ucdo i mditho”.

Me gabo hreno, u rişono catiqo d’Amerika George Dabılyu Buş bu hfuxyo dmahwele cala protestowiye dkowın, mawdacle du qatlo du Amerikoyo komo George Floyd kmahwe da fulhone dıkmisomi mqabıl di tuxmonoyutho b’Amerika latne makışrone. Bebzabno, Goerge Buş dmawdacle dıklozım dmitahwe adno la mtagılyone mırleste “u darbo ihidoyo dhozina ruhayna b’şarirutho, dımsantina lu qolo d’ğalabe farsufe dıkcayşi teşniqe u hzinutho. Atimoyotho d’Amerika lıkşowın lu tewfiqo da mtagılyone mu wahdo d’Lavayet dkıtyo mqabıl du Qusro Heworo. Kul man dkımnase dmaskıt u qolo da hzinoye lıkfohım mınyo u sukolo d’Amerika awste aydarbo u athrano kibe dhowe i duktho tawto dkulle”.