U camo d’Suweda mahwele snodo la mşihoye di Darimsuq

SUWEDA, Suriya – İ sictho du zawco mşayno di hiğmonutho d’Suweda, mtayabla athmıl taklitho di awyutho bu wahdo du neshono d’Alkarama, dmıştawtaflela ba casrowat d’hfite u farsufe ma n’abne du kenşo gawoyo, dmahwelın i hzinuthaththe udmaslelın u furqoco marıhbono dsim bi cito d’Mor Alyas dkıtyo bi şawtho di Dwelca bı Darımsuq. 

Bi taklithathe, a’mıştawtfone tcınlın lohiyotho u pankarte dkım’akdi i hdoyutho da Suriye bu nfoqo mqabıl di marıhbonutho, dıktılbi dmitaklın a’hçome cala qalilwotho, udıkkırhi u mamlo du ruğzo udi tuhmonoyutho dkıtyo bıthır da hçomani. Mbayn da slogane dmazıcqi kito “u zedqo du barnoşo Suri dcoyış b’şlomo, u basyo qatlo u marıhbonutho”. 

Dr. Lajin (H)amza dkıtyo mi sictho du tboco froso du zawco mşayno bi maqırhonutho dhula mırla “u furqoco di cito d’Mor Alyas falqo m’tahrazto jihadistyo dkıtla u nişo dımfarfıso u kenşo d’Suriya, udmıhyo darbo la qalilwotho. Hamza dıkrıhla b’qaşyutho u hçomo cali cito, tlıbla ste dmifıt baroyo li harake, bnişo dmitakılyo i marıhbonutho dkımhadıdo i şkihutho da Suriye. 

Camgabıdathe, u rişono di sictho gawonoyto du zawco mşayno sniğro Mufid Abu Cammar bi maqırhonutho dhule, matcanle i şultonutho d’Suriya i mşalutho du sutoro da mdinoye, u makadle ste dıklozım dmitaklın a’qtolcame dıkmisomi bhaq da n’abne du athro dilonoyith a’qalilwotho. 

M’gabo hreno, i sniğarto Lina Abu (H)amdan bi maqırhonuthayda makadla dıklozım a’Suriye kulle ido bido dnıfqi mqabıl di marıhbonutho, u mawdacla ste di taklithathe egartho qrihtoyo mqabıl da gunhani, u qroytoyo laşan di hdoyutho. 

İ taklithathe kımmathlo halıqto m’şişlatho d’insiyative mdinoye dmabdın bi mditho d’Suweda, bnişo dmitacle u qolo mqabıl du cnufyo udi tuhmonoyutho.