U fatıryarxo di cito Suryoyto Orthodoksoyto Mor Afrem II simle socurutho li Hazax, Midin, Bsorino uli Sare

TUR ABDIN — Athmıl yawmo makthabzabnoyo lu camaydan d’Turabdin ulu camo dnahıt me athrawotho frişe d’Urifi lu qlimo leşan dhodır i socurutho şlihoyto dsımle u abo ruhonoyo dan abne u bnotho du cito Suryoyto Orthodoksoyto-Moran Mor İğnatiyos Afrem II cam mınyono celoyo d’hsayo dhadiri acme b’Turabdin.

Lfuth i mawdconutho dmatilan mu hawraydan Alyas Vergili, bıthır mıd matiwo athmıl i qadişuthayde li dayro d’Mor Gabriel, mıstaqbalwo ba qole, ba slawotho da kohne, şamoşe u şamışyotho ubi fsihutho du camaydan. Bi dayro hadırwo’ste u rişono di karxutho d’Mıdyad bu qubolo du fatıryarxo u hawi droşo karyo beynothaye. Bi tahrazto di socuruthathe, gıdşofıc i qadişuthayde yawme d’Huşabo li mdito d’Mıdyad.

Bu zabno da socurwothani’ste, u camo kıkorıx cami qadişuthayde ucama hsayo a qıryawotho du qlimo. Adyawma’st, u camaydan layımwo bi dırto di cito d’Yuldath Aloho b’Azax u mıstaqbewole u fatıryarxo wa hsayo ba hulhole uba nquşkafe. İ qadişuthayde bu mamlo dsımle lu camo, mawdacwole i fsihuthayde dhawile gado dloqe an abne u bnotho di citayde.

Bıthır me Bethzabday, mdawamla i socurutho li cito d’Mor Yahkub bi qritho d’Midın dkıtyo heş camırto mu camaydan, u mıstaqbıl harkeste bi fsihutho du camo dnotarwole. Bi cito d’Mor Dodo bi qritho d’Bsorino ubi cito d’Mor Malke di Sare’ste layım mınyono celoyo mu camaydan u law fayışwo duktho-lo bıgawaye, wu loste larwal dıthe.