U ferco du yulfono Suryoyo di tarbitho d’Ninwe mtayable ytawto cama malfone u malfınyotho b’Bahşiqa

U ferco du yulfono Suryoyo di tarbitho d’Ninwe mtayable ytawto cama malfone u malfınyotho di tarbitho tawdithoyto Mşihoyto u du leşono Suryoyo.

 Bi ytawtathe dsimo bi qastra d’Bahşiqa bi daşto d’Ninwe, drişo i tahrazto hathto du tewlifo wa teknike hathe du nawlo, u kleste cala qetre dıkloqın amalfone bu maşıqlo du tewlifo.

 Bu taro di tahrazto şatonoyto di mdabronutho gawonoyto du yulfono Suryoyo di şato da 2020, u ferco du yulfono Suryoyo di tarbitho d’Ninwe, mtayable athmıl ytawto cama malfone u malfınyotho di tarbitho tawdithoyto Mşihoye u du leşono Suryoyo. Li ytawtathe dımtaybo bi madraşto d’Bahşiqa da bnotho, mıştawtafle u mdabrono du ferco du yulfono Suryoyo d’Ninwe Samir Yuxanna, u mdabrono di tarbitho d’Bahşiqa Riayd Cıgab, u mşalo du duyoqo dcalu yulfono Başşar Hadi u menyono d’malfone di tarbitho d’Bahşiqa u du yulfono Suryoyo d’Ninwe.

Bu şuroyo di ytawtathe, mqadım tahınyotho calu futoho d’ferco du yulfono Suryoyo b’Bahşiqa u la malfone hathe dımbayni. Ubıthır drişi sebwotho dkıtlın asirutho cami tahrazto hathto du tewlifo u cama teknike hathe dıkmitıstacımli bu nawlo. Bebzabno, makıd bi ytawtathe i ulsoyutho dhowe mıştawtfonutho ba cadcide u ba hfitwotho dıkmtaybo i mdabronutho gawonoyto du yulfono Suryoyo.

Camgabıdathe, drişi a darbone dkibın dşorın a qetre dıkloqın a malfone u malfınyotho, u mawdıcste dıklozım dhowelın esore cama mşale dıksaymi u duyoqo dcali tarbitho Mşihoyto u du leşono Suryoyo, bnişo dmışrın a qetrathe. Bu huthomo di ytawtathe, drişo i tahrazto şabthonoyto u şatonoyto du maşıqlo du yulfono Suryoyo.