U folitiqoro Amerikoyo Peter Galbraith m’akadle cali ulsoyutho di ithutho folhoyto d’Amerika b’Suriya

SURIYA – Bi maqıblonutho dsımla i dafo d’Rudaw camu Peter Galbraith dkıtyo qariwo la Kurdoye du Cıraq, mawdacle i hzaytayde cali aykanoyutho d’Suriya u dilonoyith calu garbay madınho d’Suriya. Lfuth u mşalo Amerikoyo, u mınyono da folhe Amerikoye dgımıtre b’Suriya latyo ulsoyo, elo klozım dfoyış haylo dqodır baroyo dobe funoyo l’Dacış leşan dlo qowe naqla hreto bu athro.

Bi maqıblonuthathe griş u zuhoro calu mamlo du rişono d’QASAD dmawdacle u mınyono da marhıbone dkıtne msike, u qento dıkmşakli ucali ulsoyutho dımdawmi a cuqobani cal Dacış. Rudaw mkararla u mamlo d’Bassam İshak-dkıtyo u mathlono du Mawtbo d’Suriya Demoqratoyto b’Amerika calu teqwiyo da nuqazyotho d’Amerika b’Suriya elo dgımıgrış 400 folhe mu qlimo.

Galbraith kımawdıc, di aykanoyutho dkito ucdo b’Suriya kobo mkone hathe lu dcoro d’Dacış. Latyo ulsoyo en 1.200 folhe’ne aw 800 folhe’ne-u muhim a cuqobe di naşfe udi hawa dıklozım dmidawmi cala krılyotho d’Dacış’yo. Lfuth u mşalo Amerikoyo, Turkiya dkıtwola esore baroye cam al Şarıc wa haylayde, kımahwe ucdo gıdmarhıq ruhe me Ankara u dımqarıw lan athrawotho Caraboye-cal dıkrukwi tawtır cala timoyotho ideolojik u marduthoye d’Suriya.

Camathe’ste kito ucdo mkono rabo la droşe du şlomo beyn Suriya u İsroyel u dmımte l’qyomo dmıgroşo İsroyel ma thume d’Suriya. Bi sbutho du şekolo du nomuso esonoyo hatho d’Suriya, Galbraith mawdacle da Kurdoye klozım dtulbi du nomuso hatho dmişakıl me Mawtbo nomusoyo dilonoyo dımnaqe-u dlo maqbıli nomuso dımbayın me belhude al Şarıc. Awkith a Kurdoye klozım dhowın qrihe ba talabathe.

Peter Galbraith komır; Nomuso kmişakıl ba talabe uba droşe dkowın beyn da came frişe dkubci dhowelın mathlonutho tawto ebe. 35-40 ba mo da bnaymothoye d’Suriya-Kurdoye, Callawiye, Mşihoye u Druz’ne u beyn 60-65 ba mo’ste Sunna Caraboye-d’sagiyoyutho menaye sekuler’ne. Bu hşowano dıknofıq li holo, Suriya layba dhowela nomuso Maşılmono. Calathe a camani klozım dlo tenhito d’katfo, dtulbi maşıqlo demoqratoyo u dım’amni da came d’Suriya’ne dıklozım dımbayni u dactith du athrathe.