U gayso d’Isroyel sımle hçomo cal Darımsuq
Tlotho hadome bi kongre d’Amerika tlıblın m’İsroyel dmakılyo baroyo a’hçomayda cala n’arcotho d’Suriya, u mzaharlın mu dewam da hçomani dkımmathli terpılto b’qamuthıd du terkiwo dş şalyutho b’Suriya. Mxasra hreto, İsroyel manhatla haylo folhoyo hedor dı Darımsuq dmahıtle ido cal makinat Turkoye dıksaymiwo ğoşuşutho cal İsroyel. Bebzabno, Tel Aviv mzaharla i şultonutho dı Darımsuq dlımatico la fusqone ulu amro dkothela m’Turkiya.
DARIMSUQ — Bıthır mdımkamelın i socuruthaththe l’Suriya dlaqınwo eba u rişqutno Ahmad Alşarıc u mathlone ma came tawdithoye u kenşoye mşahılfe du athro, i senatore Amerikoyto Jean Shahin mu gabo Demoqratoyo, i senatore Qutnuthoyto Eljony Ernest wu hadomo bu mawtbo tahtoyo di kongre d’Amerika Jo Wilson frıslın buyono mşawtfo lu tboco froso. Bu buyonaththe, a’tlotho mşale Amerikoye mawdaclın dırğışlın d’Suriya bıthır m’14 ışne du qrobo, sniqoytoyo ucdo l’aftho şarirto laşan dmakışro, u grışlın u zuhoro cala hçome İsarloye dıkmisomi cal Suriya dıktorın casqutho dmişarır u nişano.
A’tlotho hadome di kongre d’Amerika mqalaslın u fusqono dmıdle u rişono Donald Trump dmaqımle a’tedbire dmahtiwo cal Suriya, u mathkarlın di dawsathe ftıhla u darbo b’qamuthıd d’knuşyo baroyo u makthabzabnoyo dımtayıb bayn di şultonutho d’Suriya udı İsroyel bi mescoyutho du mathlono dilonoyo d’Amerika Tomas Barrack.
Şahin, Ernest u Wilson makadlın da Suriye hadirene dımhalqi dawsat lafqudmo bi sbutho du şlomo cam İsroyel, u sımlın qroyto l’Tel Aviv dmıstafdo mi afthathe, udmakılyo baroyo a’hçome bceldboboye cal Suriya, bnişo dmidawım dmihalıq dawsat lafqudmo bu maşıqlano. A’tlotho mşale Amerikoye mawdaclın ste d’Suriya i şlitho wi mşayanto kımmathlo u darbo ihidoyo du nfoqo mqabıl di şalitutho du İran uda tehdide du tukoso marıhbono dı Dacış.
M’gabo hreno, mşalo İsarloyo di mşaynutho mawdacle da haylawothayde b’cuqobo dilonoyo dsımlın yawme d’Arbıco dşaficina hedor dı Darımsuq, mfarfaslın makinat Turkoye ğnize dızriciwo b’Suriya laşan dmisım ğoşuşutho cal İsroyel. U mşalo İsarloyo bi maqırhonutho dhule lu froshezwo Caraboyo d’Al(h)adath, mawdacle du tenhito du haylo İsarloyo qariwo mı Darımsuq ulsoyowe ğalabe laşan di mşaynutho d’İsroyel, u mırle “mzaharlın i mdabronutho d’Alşarıc dlımıştacyo bi nuro, udlımatico lu amro dı Turkiya. Anqara kımnasyo dımqarwo m’İsroyel zıd mu mede dıklozım”.
U mşalo İsarloyo mawdacle ste dımzaharwolın mı meqım i şultonutho d’Suriya dlımnasyo dımçarbo i msaybıronutho d’İsroyel aw u thumo da cuqobe dıksaymolın, u mırle “a’makinat Turkoye di ğoşuşutho şkihewın hedor dı Darımsuq m’zabno dıkdocır l’zıd m’10 ışne”.
Putin hule şudoyo dgımdawım u fulhonayde leşan u sutoro da Mşihoye bu Madınho
U rişono d’Rusya Vlademir Putin bi maqırhonutho dhule lu tbocofroso, makadle dkobıc dımdawım bu …
