Donald Trump sımle qroyto dmitabde şalyuthzayno udlo şartat bayn d’Rusya u Ukraina l’zabno d’yarho

WASHINGTON – Athmıl bıthır mu mamlo dhawile bu talafon camu rişqutno d’Ukraina Volodimer Zelenski, u rişono d’Amerika Donald Trump bi maqırhonutho dıfrısle bi dafayde du nawlo, mawdacle da droşe bayn d’Rusya u Ukraina kımdawmi u mırle “Amerika ksaymo qroyto dmitabde şalyuthzayno udlo şartat l’zabno d’30 yawme”. 

M’gabo hreno, Zelenski mawdacle dhule xabro l’Trump bu talafon dhawi baynothaye, d’Kiyev hadırtoyo dmisım mucdo şalyuthzayno l’zabno d’30 yawme cam Rusya. 

Bebzabno, Zelenski bu mamlo dsımle athmıl casriye bu froshezwo mırle “dothe dmitafito la haye i şalyuthzayno l’zabno d’30 yawme xdu renyo dımqadamwola Waşington inaqla qamayto bu yarho d’Odor dşaficina, gıdhuyo xıd işara şarirto l’dawsat lafu şlomo”. 

Zelenski mawdacle ste dıklozım Rusya dmahwiyo dkıtyo hadırto lu tekliyo du qrobo, udmabdiyo şalyuthzayno dlo şartat. 

Mxasra hreto, i rişonitho du komisyon d’Urifi Ursola Von Der Layen mawdacla dkım’aydo u renyo dımqadamle Trump bi sbutho di şalyuthzayno bayn d’Rusya u Ukraina. 

Athmıl u gayso d’Rusya makadle dkıtyo b’fusqono kamilo dfayto la haye i şalyuthzayno da tlotho yawme dımbaunole u rişqutno d’Rusya Vladimer Putin. U gayso Rusoyo mawdacle ste dbalhude gıddobe funoyo la hçome d’Kiyev dıkdayşi i şalyuthzayno.