U gayso Iraqoyo markawle hayle folhoye bu garbyo du qlimo d’Kerxeslox mqabıl Dacış

U gayso Iraqoyo, markawle athmıl hayle folhoye bu garbyo du qlimo d’Kerxeslox dhawi ba zabne haroyani wahdo, du tuyobo da plane da hçome da ğrobe marhıbone d’Dacış.

Me gabo hreno mawdıc, d’12 ma powelıs federaloye du Iraq qtili u 5 hrene mçarhi bu hçomo dsımlın a marhıbone aclaye bhdo ma qıryawotho du qlimo.

 Athmıl mşadarle naqla hreto u gayso Iraqoye mınyono dfolhe lu garbo du qlimo d’Kerxeslox dheş kito şwolo aclaye beyn di şultonutho d’Boğdod udı Arbil. Bu garbyo du qlimano’ste, kito xalyutho rabtho wa krılyotho da marhıbone kmıstafdi mena leşan u tuyobo da hçomathe cala mdinoye ucala hayle Iraqoye.

A hayle Iraqoye grişiwo me Sargarran u Dibis bıthır ma hçome qaşye dsimwole Dacış aclaye elo bıthır, tlıbwolın a comure da dukothani ma hayle folhoye d’ducri u dmaklın a hçomani d’Dacış. Ğalabe ma 42 qıryawotho dkito ba dukothani’ste maxlanwo mi zuctho da hçome uda htofe uda qatle dsımlın a marhıbone.

Elo u qetro dkito, da comure lo kubci a hayle Iraqoye calu qento di kampanya dmisomi kulle Caraboye u kıtulbi di peşmerge dsaymo u duyoqathe. Me gabo hreno mawdıc, d’12 powelıs Iraqoye qtili u 5 mçarhi bu hçomo marhıbono dsim adyawma safrayto bi qritho d’Satiha b’Kerxeslox. Meqım mu hçomano’ste nafıqwo taxtuşe beyn da marhıbone u da powelıs Iraqoye.