U gayso İsarloyo hule amro la comure bu mesco d’Ğaza dmaxlın a’fenyothathe. Hıdriye di cuqobe mqabıl Hamas
ISROYEL / GAZA — Athmıl u gayso İsarloyo hule amro la Fleştoye dıkhoyın bu mesco du qlimo d’Ğaza, dmaxlın baroyo a’dukothaththe, bnişo dmarwıh a’cuqobayde mqabıl du zawco marıhbono d’Hamas.
U malolo du gayso İsarloyo Avixay Adırci bi maqırhonutho dhule lu tboco froso Caraboyo, mawdacle du gayso gıdmarwıh a’cuqobayde bi fnitho du tayman macırbo dı Dayr Albalah dlıssımwo eba meqım cuqobe folhoye.
Adırci bu mamlo dsımle la comure Fleştoye mırle “laşan i mşaynuthathxu maxlayu i duktho baroyo, u maftelu fothayxu lu taymno li xasra di maşritho d’Almawasi”.
Lfuth mabuce İsarloye, u gayso hul ucdo lıcabır li fnithathe cal dıkmisım texmin d’Hamas khıbşo eba a’yasire İsarloye.
Mbayn da 50 yasire İsarloye dfayişi, kmisım texmin dkito baynothaye bu noquso hul 20 dkıtne heş ba haye bu qlimo d’Ğaza.
U makıthbo d’Emwotho Mhaydotho di sdirutho da sebwotho noşoye, bu yarho d’Konun u Haroyo mawdacwole d’zıd m’80% ma n’arcotho du qlimo d’Ğaza hew amro dmitaxlın mu gayso İsarloyo.
Putin hule şudoyo dgımdawım u fulhonayde leşan u sutoro da Mşihoye bu Madınho
U rişono d’Rusya Vlademir Putin bi maqırhonutho dhule lu tbocofroso, makadle dkobıc dımdawım bu …
