U hasyo di cito Suryoyto Qatholiqoyto Mor Afram Yusıf Cabba mşarele ruşmoyith bi wolithayde i hathto

U rişono hatho di marcitho d’Mawsal u d’hedora di cito Suryoyto Qatholiqoyto hasyo Mor Afram Yusıf Cabba, mşarele ruşmoyith bi wolithayde i hathto.

Hasyo Mor Afrem dımbayın rişono di marcitho d’Mawsal mdarbıd du hasyo mşawtbo Mor Yuhanna Bıtrıs Muşe, mrayşanle u qurobo alohoyo qamoyo bi mditho Suryoyto d’Bağdede di daşto d’Ninwe.

İ qadişutho du fatıryarxo di cito Suryoyto Qatholiqoyto Mor İğnatiyos Yusıf Tlithoyo Yunan, bıthır mıdmaqbewole isticfa du rişhsayo di marcitho d’Mawsal ud’hedora Mor Yuhanna Bıtrıs Muşe, mbayanwole mdarbe bu siqumo d’18 bu yarho d’İlıl dşaficina, u rişono di marcitho d’Boğdod hasyo Mor Afram Yusıf Cabba dkıtyo bebzabno u notarrozo di Sunadso mqadaşto di cito Suryoyto Qatholiqoyto.

Callathe ubu siqumo d’3 bu yarhano, u hasyo Mor Afram Yusıf Cabba mşarele i wolithayde xıd rişono hatho d marcitho d’Mawsal, u mrayşanle u qurobo alohoyo qamoyo d’yawme d’Huşabo bi cito d’Yuldath Aloho d’Altahira Alkubra ubi cito d’Mor Yuhanon Macımdono bi mditho Suryoyto d’Bağdede di daşto d’Ninwe.

Hasyo Mor Afram Yusıf Cabba baroyo bıthır mdımkamele i slutho du qerowo dhadırle menyono celoyo mu camaydan d’Bağdede, sımle knuşyo gawonoyo cama kohne u xuroye di marcitho, u drışle acmaye dmitahıt tahrazto hathto du fulhono, udmitaqwiyo i mşablonutho ruhonoyto u mdabronitho di marcitho d’Mawsal ud’hedora.

Bi maqırhonutho dıfrısle fatıryarxo Yunan, tlıble kuşore lu hasyo hatho Mor Afram Yusıf Cabba bi rocyutho di marcitho d’Mawsal, u mqadamle ste a’tawdiyothayde lu hasyo mşawtbo dmeqım Mor Yuhanon Bıtrıs Muşe dımdabarwole i marcitho bı maşıqlo ğalabe casqo dilonoyith bu zabno dıtrıdwole u tukoso marıhbono dı Dacış u camaydan mi mditho d’Mawsal umi daşto d’Ninwe.