U froshezwo Alcarabiya frısle flim dokumentar cala Mşihoye d’Mawsal

U froshezwo mşamho d’Alcarabiya, frısle flim dokumentar cala Mşihoye d’Mawsal bu calway “qay a’bote di mdithathe xalyene ma Mşihoyaththe”.

Bu flim dıfris, kmitawdıc da Mşihoye d’Mawsal dkıtwe u menyonathe 20 alfo meqım mu koboşo di mditho m’Dacış, ucdo u menyonaththe bi mdithathe balhude zıd mu sfiqoyo bışmo.

 Mlawğıl du hrowo dhawi ba citotho maktahbazbnoye da Mşihoye dıkhoyanwo bi mditho catıqto d’Mawsal, mu wahdo d’Hawş Albayca sımwole i qadişutho du papa Mor Fransis Qadmoyo qroyto la Mşihoye dıdıcri li mdithaththe d’Mawsal bıthır mıdşafıc arbac ışne calu hurorayda m’Dacış, u bıthır mi qadişuthayde ste u rişqutno dı Fransa Emanuwel Macron sımwole cayni qroyto la Mşihoye d’Mawsal. Ba melani mşarele u flim dekomentar dıfrısle u froshezwo mşamho d’Alcarabiya cala Mşihoye d’Mawsal d’qay hul ucdo lıddaciri li mdithathe i makthabzabnoyto wa botaththe fayişi hul ucdo xalye ma comuraththe.

Cali teşcitho du camaydan di mditho d’Mawsal, u matibono du froshezwo d’Alcarabiya grışle u zuhoro cala bote da Mşihoye dkıtne bi fnitho d’Hawş Albayca dfayişi xalye mu zabno dıtridiwo mu tukoso marıhbono dı Dacış bi şato da 2014, wa adyawma a’botani a’mbarbıze dfayişi xalye khıdni i cito mşamahto di Şuctho dkıtyo bi mditho catıqto d’Mawsal. U matibono d’Alcarabiya kmawdıc ste dlayto hul ucdo ulo işara dıkmadilo dhın ma Mşihoye d’Mawsal i catıqto gıdıcri la botaththe u gıdmolın i xalyutho wu vyoco du makthabzabno dkıtwolın a’Mşihoye bi mdithathe.

Rep camu kohno “kıtlan citotho bı Mawsal dıkdocır u makthabzabnaththe l’mowat dışne. İ cito qamayto bı Mawsal i catqıto kdıcro lu doro ştithoyo. Adyawma trisoyo du dcoro da Mşihoye l’Mawsal mhiloyo awkith hedor 70 yaqrotho ne dıdciri hul ucdo, u sabro şkihoyo u inşalla i aykanoyutho gıdmişahılfo u gıdıcro xıd kıtwa meqım”.

Bıthır mathe, u froshezwo d’Alcarabiya kımşalıt bahro cal gabro mu camaydan dıkorıx cami sayirtayde bayn da harbotho d’Mawsal i catıqto. Mithon dmawladwo bı Mawsal balhude ba nışne du kboşo dı Dacış frışwo mi mdithayde, w’ucdo bılhiqutho rabtho dacır li mdithayde i catıqto u mşarele m’hatho u fulhonayde xıd sayoro la dukotho da Mşihoye. Mithon farsufo mu camaydan yo dıkcımriwo bı Mawsal i catıqto dkıtwa u qentrun di şkihuthaththe, udmaxılyo adyawma menaye bı maşqıle frişe.

Rep “bıthır mıdathiwo Dacış azzanowa l’Arbil, ubıthır m’Arbil maftewoli fothi li mditho d’Boğdod u cayışnowa eba cal dkiba fulhono u harake rabtho du  bnoyo. Bı Boğdod flıhwoli xıd sayoro bi fnitho d’Alxudır. Ubu zabno dsımwo u huroro d’Mawsal i catıqto baroyo dacırno lu baytaydi li fnitho d’Hawş Albayca. A’bıthıqbure da n’abohothaydi ste bi fnithathe ne”.

Lfuth u matibono du froshezwo d’Alcarabiya, u menyono du camaydan bı Mawsal kul d’ath naqıswo, mfothıd da şğuşye dkıtwo bu Iraq. M’45 alfo farsufe dkıtwe u menyono du camaydan bı Mawsal meqım mi şato da 2003, matiwo l’noqıs m’20 alfo meqım mu kboşo di mditho m’Dacış. Elo u tukoso marıhbono qşıcle i ithutho Mşihoyto bı Mawsal hul darğo dkıtyo u menyonaththe ucdo balhude zıd mu sfiqo bışmo.