U hoşulo Suryoyo bi mditho d’Mırde qayıthle u şukono d’UNESCO

Suphi Yerlihindi hoşulo Suryoyo bi mditho d’Mırde qayıthle u şukono d’UNESCO da xıznat du barnoşo cayoşo.

 Suphi Yerlihindi mawdacle hzinoyoyo cal di calaqa dnaqiso li sınca di haşilutho di zifkariye.

Suphi Yerlihindi ma Suryoye d’Mırde u hani 65 ışne ksoyım hoşulutho du semo i sınca du camaydan dkıtwe mşamho biya bu qlimo. İ hoşulutho dıksamla heş huwe cımre 10 ışne hol adyawma kımdawamla, kul yawmo me safrayto kızze li dukanayde u ksoyım ma telat du semo, şayre, tawqe du qdolo, marwode, xuwas u mdone mşahılfe.

Meqım mu camaydan dımgalwewo mi mditho d’Mırde, i sınca di hoşulutho du semo ğalabe mşamahtowa u kıtwo mınyono celoyo ma abne du camaydan dkıtwın stadin di sıncathe. Elo camu nqoso du mınyono du camaydan mi mditho i Sıncatheste madcafla ğalabe. U medano ktore dmıxlıq hzinutho s’Suphi Yerlihindi bu cımrayde da 75 ışne dıkımdawamla bhubo rabtho.

İ sıncathe di hoşulutho du semo bu turkoyo kmitawmarla Telkari, kmıcwıd cala elat rafice du semo u kmisım zine. Suphi Yerlihindi i sıncathe cam gabıd du semo ksamlaste calu dahwo.

Bi maqıblonutho dhule Suphi Yerlihindi li dafo du nawlo u qolo d’Amerika, kmahke bcımro nacimo yalıf i hoşulutho mu ahunayde drab mene, wi naqlayo cal dlatwo kahrıbo cali lampa du ğaz cudiwo. Hollocdo huweste mawlafle lğalabe farsufe i sıncathe, elo bcayni zabnoste hzinoyoyo cal dlo mrabe ğalabe stadin di sınca.

Suphi Yerlihindi dıkmahke mawlafle ğalabe noşe elo mgalwelın mı Mırde, zabno huweste mgalwewole elo bıthır dacır li mdithayde Mırde u tamo kımdawım dmawdıc i sıncathe u dmawlafla la yolufe u yolufotho.

Suphi Yerlihindi me meqım qayıthwole şukone mşahılfe elo u şukono haroyo qayıthleyo m’UNESCO bu ışmo da xıznat du bnaynoşo cayoşo.