01/03/2020

U Huyodo Caraboyo grışle u zuhoro cala mudaxalat baroye dıkmaqşın i aykonoyutho d’Suriya

U Huyodo Caraboyo, grışle u zuhoro calu qento di mudaxala da hayle qlimoye uda hayle Emwothoye lu qrobo gawoyo d’Suriya.

 ​​​​​​​Bu knuşyo dsımle u Huyodo Caraboyo m’akadle, di mudaxala baroyto lu krizano d’Suriya, belhude zıttır kmaqşe i aykanoyutho d’Suriya u lıkobe aftho dmiqafe şroyo mşayno lu krizano.

U notarozo gawonoyo du Huyodo Caraboyo Ahmed Aboul Gheit huwle maqırhonutho calu qento di mudaxala dıksaymi a hayle qlimoye wa hayle Emwothoye lu qrobo gawoyo d’Suriya. I mudaxalathe’ste belhude kımahrıwo i aykanoyutho u lıkturyo gado, dmiqafe şroyo mşayno lu qrobano.

Aboul Gheit sımle qroyto la hayle kulle dkıtne bıgawe du krizano d’Suriya, baroyo dmaklın a hjome wa taxtuşathe u dsaymi şalyuthzayno-dilonoyith bu garbay madınho du athro. Bi maqırhonuthathe u notarozo gawonoyo du Huyodo Caraboyo grışle u zuhoro cala taxtuşe qaşye dıkmdawmi u aydarbo kowın celtho, dı qoşe u qrobo b’Suriya.

U makthbo d’Ahmed Aboul Gheit mırle; U teqşiyo du qrobo bu garbay madınho d’Suriya, mathlo towoyo lu dyoşo dkowe cala qonune Emwothoye u noşoye. Mcal fothe da taxtuşaniste, xliq gunho noşoyo dı jbırle hol milyon dıbnaynoşo ma dukothathe wa dukotho da mdinoye, madraşyotho u bethkrihe uğer, kmimodi nişo la hçomani.

U makthbo d’Aboul Gheit m’akadle, da taxtuşani qaşın, dilonoyith bıthır mi mudaxala d’Rusya u d’Turkiya lu qrobano u kali cali ulsoyutho dmitaklın a hçomani wa hayle kulle dfayşi masre ba qyome uba fusqone dıkmimodi leşan dhowe şalyuthzayno. Aboul Gheit mawdacleste du Mawtbo di Mşaynutho d’Emwotho Mhaydotho kıtle mşalutho, dmarkıw şalyuthzayno noşoyto u dımcadır hol 3 milyone dıbnaynoşo dkıtte sniqutho l’mcadronutho noşoyto.