U huyodo da Neşe d’Bethnahrin sımle hago bi ohnutho d’8 Odor

ALMANYA – U hagano dımtayıb mi sictho d’HNB u ferco d’Gutersloh u Paderborn d’Almanya cama şutose du Mawtbo Umthoyo d’Bethanhrin mşarewole bu falqo marduthoyo dmahwelın a lbuşe maktbzabnoye u marduthoye du cameydan. Bu kle qatinto d’şetqo leşan da mithe du zulzolo. 

Bıthır mathe i mşalonitho d’HNB u ferco d’Gutersloh u Paderborn İbtisam Gawriye mqadamla mamlo cali mıcne d’8 Odor dkıtyo u yawmo dilonoyo du mrodo dmahwelın a neşe bu maktabzabno bu ağuno dhulın li hirutho. Be bzabno mhanela a neşe du cameydan bu yawmano u dilonoyo u sımla qrayto dmıştawtfi la hfitwotho u lu ağuno di hirutho u di şawyutho.   

U mmathlono du Huyodo Suroyo d’Urifi ESU bi fnitho Gabro Tuma mqadamle mamlo u mhanele a neşe bu yawmano.   

Bu lalyano hiw darbo li musiqi wu camo mşarele dmahwe i fsihutheyde lu yawmano d’8 Odor. U zamoro Wasim Hanna mafsahwole a hadire ba zmaryotheyde wa neşe me zabno l’zabno mascaqwolın u slogan Athto, Haye Hirutho.  

Be bzabno qtico i kuktho du lalyano dımtaybowa me Nevert Gawriye xıd sponsor lu hago. U kesfo dıgfoyış mu hagano dıfris bu Facebook d’Suroyo TV hayo, gıdmitahwe la sniqoye du zulzolo d’Suriya u Turkiya.   

U hagano dımhadır bu taro da hfitwotho d’8 Odor u yawmo tibeloyo da neşe  mdawamle ba zmaryotho u radqe camoye u marduthoe la şoce mwakhre du lalyo.