U Huyodo da Neşe d’Bethnahrin simle konferans da neşe b’Swisra

U konferansano dımtakaswole 14 bu yarghano u Huyodo da Neşe d’Bethnahrin-HNB bu hudro da Suryoye b’Contone d’Swisra bi şoctho da 18.00, hadırwole 3 şutose hrene dkıtwın-HNB, u şutoso du integrasyon du kanton d’Ticino, u gabo da semoloye d’Ticino, u şutoso da buhone dcali golutho.

U konferansano dmahıt bu ışmo; Leşan u iqoro da neşe u mqabıl dkull şıkıl dişutho cala neşe, i mathlonitho d’HNB Hana Hobel kalyo calu şuşoto dsımle u huyodo d’HNB, makthabzabno du cameydan wu dawro di athto u mede dcayişo ba qrobe-dilonoith bu Sayfo da 1915 ubu zabno da hçome dsımwole Dacış calu cameydan.

Hobıl kalyo’ste calu dawro dmıştacela athto bu şuşoto di mardutho udi mdabronutho wu adyawmaste-cam HNB dmıdla dawro ulsoyo bu haqlo folitiqoyo u mşalutho ba fulhone dıkmisomi bu athro ubi golutho. Michela Trisconi kalyo calu şutoso du integrasyon du kanton, u yuqro dkobın lu şuşoto da neşe. Lisa Boscolo mahkela cala casqotho dıkgurşi a neşe heş bu baytathe u bıthır gawonoyith b’Swisra u kalyo cali lo şawyutho dkito bu kenşo.

Lu konferansano hadırwo’ste mathlono mu Gabo da semoloye doktor Savary Giuseppe-umu cameydan hadirwo Abuna qaşo Abrohum Bandir u mathlone mu Mawtbo di Cito d’Mor Yahkup umu hudro da Suryoye Contone. U konferans hthim u konferans cam hşamto marduthoyto da muklone du cameydan dımhaydıri ma neşe mothonoye du cameydan. HNB kımkadim a tawdyotheyde dilonoith la neşe dhawilın tacbo bu tuyobo da muklone udu konferans gawonoyo.