U Huyodo d’Urifi hule şudoyo dgıdsoyim fulhone zıd laşan dhowele haylo folhoyo qweter mqabıl di madatho du gumrık dmahıtla Amerika u ğer casqıwotho momunoye hrene

BRUKSEL – A’rişone da n’athrawotho du Huyodo d’Urifi layimi adyawma bi mditho dı Bruksel, laşan dıdırşi aydarbo kibe dımdawmi bu snodo d’Ukraina bu qrobayda mqabıl d’Rusya, udkolın cala fulhone dıksaymi u garanti dfoyış u Huyodo aminoyith morıd d’momuno qawyo mqabıl da n’athrawotho rabe konkurens dıbritho. 

Lfuth i tahrazto da fulhone du knuşyano, drişo ste i sbutho da cuqobe folhoye haroye d’İsroyel bu qlimo d’Ğaza wi buçça du Huyodo d’Urifi dıbqamuthayna. 

Camgabıdathe, a’rişone da n’athrawotho du Huyodo drışlın a’renye dımqadmi mu komisyon d’Urifi bi sbutho du teqwiyo du haylo folhoyo, udu tezido du şqolo da zayne Urifoye, udmisım tarmiyotho rabe di mudafaca mşawtafto bayn da n’athrawotho hadome du Huyodo. 

Bu knuşyano ste, drişo ste i zuctho dkito dfoyış u Huyodo d’Urifi mşawhıro mqabıl d’Amerika ud’ğer athrawotho ba muroye du haqlo du teknoloji tibeloyo, in dothe u Huyodo dlımoyıd fusqone msarhıbe, udlımbayın kmoyutho rabtho d’zuze lu medano. 

Meqım ma ytawyotho du knuşyano, i mşalonitho di siyase baroyto du Huyodo d’Urifi Kaya Kalas mahwewola sabro du Huyodo d’Urifi d’obe şudoyo dım’amın tre malyune d’foqucwotho da topat lu gayso d’Ukraina, bnişo dmitaqwiyo i mudafacayde mqabıl du kboşo Rusoyo, dilonoyith bıthır mıdlımakşarla Kalas dım’amno snodo makfiyono lu insiyativayda bi sbutho dmitahwe mcadronutho folhoyto bu timo bayn d’20 uhul 40 milyare Euro l’Ukraina.