Mahwe hfuxye me mşale du Huyodo d’Urifi, mu Tukoso da Zedqe Noşoye uğer şutose frişe calu msoko d’Ekrem İmamoğlu

BRITHO – Bı maqırhonutho mşawtafto dfriso mi mşalonitho du Komisyon da esore baroye du Huyodo d’Urifi uğer mşale Urifoye, mawdaclın ilo thnihuthathe calu msoko d’Ekrem İmamoğlu. Bi egarthathe a mşale Urifoye mawdaclın, du msokano uda thomani athın lu huwoyo, mqabıl d’folitiqore dımnaqın mu camo, mqabıl folitiqore hfite, gelyunore, tagore u mdinoye uğer dlatne thnihoye mu şıkıl di mdabronutho d’Turkiya.

Calathe mawdıc du Huyodo d’Urifi kısoyım qroyto la mşale Turkoye, dımyaqri a zedqe şaroye wa qonune du athro. Mawdıc’ste, Turkiya dkıtyo hadımto bu Mawtbo d’Urifi, kmıntır mena dımtabqo a standarde di demoqratoyutho u dmafitolın la haye. En Turkiya kubco dfayşo ba esore camu Huyodo d’Urifi, klozım dımyaqro a prensibani kulle. İ rişonitho du Tukoso da Zedqe Noşoye-Emma Sinclair Webb, b’qaşyutho krıhla u msokano du rişono di karxutho uda farsufe hrene dımsiki-tlıba baroyo dmitarfın u mırla’ste; Hano isticmal du sistem di kinutho’yo.

U qedomano d’Ankara, leşan dmitadcıf u haylo da gabe di saqıbloyutho’yo.Bıthır mu msoko d’İmamoğlu, sımle u polis Turkoyo cuqobe cala nuqazyotho di sosyalmedia u sxir dafe frişe. A dafani sxiri, bıthır mıd mşale u mathlone d’tukose noşoye, ğrobe u farsufe hfite b’britho mawdaclın u snodathe l’Ekrem İmamoğlu. Calu msokano’ste du rişono di karxutho, sim’ste protesto bıgawe du parlamento d’Turkiya ma qoyume di CHP udu gabo d’DEM.

Mawdıc, dhano yawmo catumo’yo bu makthabzabno d’Turkiya u dhınne, gıdmdawmi u snodathe lu rişono di karxutho İmamoğlu. Calu jğuşyano dhawi bıgawe du parlamento, u tahlufo du rişono du parlamento’ste sımle nyuhto d’20 qatinotho. Bu mamlo dsımla i malılto di Kongre Demoqratoyto da Came-Meral Danış Beştaş’ste mawdacla du şlomo wu inqlab, laybın dhowın camhıdode. U mede dsim athmıl b’Stanbul, inqilab mqabıl di demoqratoyutho’yo u mqabıl du rişqutno hatho dgıminaqe b’Turkiya’yo.