Mosko, naqla hreto grışla u zuhoro di şultonutho d’Armenia, dlo mraçco li hadomutho bu Huyodo d’Urifi u gzımla Yerivan b’funoyo qaşyo

MOSKO – U nfoqo d’Armenia mu Huyodo du Momuno d’Eurasia dkıtyo bi rişonutho d’Rusya, bu zabno du maşıqlo da droşe dcali muraçaca d’Armenia lu Huyodo d’Urifi, gıdmkalıf ba milayare dolare cal Yerivan. Bu mamlo dsımle u notarozo du Mawtbo di Mşaynutho d’Rusya Sergei Şoigu, grışle u zuhoro d’Armenia dmaklıyo i muraçacayda.

Bu mamlo dsımle Şoigu la gelyunore b’Mosko, gzımle Yerivan u mawdacle, d’Kremlin lo belhude gıdmahto gumruk yaquro calu mal d’Armenia, gıdmacılyo’ste u timo du energi dobo lu athro ubebzabno, gıdmadcıro’ste ba mo alfayo d’galwoye Armınoye dkıtne falohe b’Rusya.

Lfuth Şoigu, a tedbirani gıdobın husrono rabo lu momuno, li tagorutho d’Armenia, gıdmaclın i batilutho da şuğlone u gıdmahrıwi u standard da haye bu athro. Elo heş meqım u parlamento d’Armenia maqbewole i rmoyto di muraçaca lu Huyodo d’Urifi meqım yarho, mqadamwola Mosko cayni şıkıl d’gzome l’Yerivan.

U teqbilo di rmoytathe’ste mfaşaqwo me Rusya xıd dawse qamayto, du nfoqo d’Armenia mu Huyodo du Momuno d’Eurasia. Elo i şultonutho d’Yerivan mfanewola, dlatte ucdo plan dmıgroşi mu huyodano di tagorutho udu renyo du şuhlofo du qonuno dmaqbıl bu parlamento, latyo muraçaca li hadomutho du Huyodo d’Urifi.

Bu yarhano, mıntarwo dmimodi i sbuthathe naqla hreto li ido b’Armenia, elo mşawhıro me şwole teknikoye ulo mbayın siqumo hatho lu droşo dacla. Calathe xlıqwo spekulasyone, du rişwazire Nikol Paşinyan mşahlafe u renyayde bi sbutho di hadomuthathe lu Huyodo Urifoyo-bu maşıqlano dıkmdawmi a esore beyn Rusya u Amerika calu qrobo d’Ukraina.