U huyodo d’urifi sxırle athumeyde laşan tedbire mqabıl du kewo d’Corona

U Huyodo d’Urifi fsıqle dmısxori athume baroye du Huyodo l’zabno d’30 yawme, bnişo dlırowıh u froso du virus d’Corona b’gawıd da nathrawotho du Huyodo d’Urifi.

Be bzabno, u komisyon d’Urifi mawdacle da mşale Urifoye lımqadamlın b’zuhoro ba yawme qamoye du burbozo du virus d’Corona.

Arişone du Huyodo d’Urifi bu knuşyo dsımlın athmıl bu darbo du video konferans, matın lawyutho dsıxri athume baroye du Huyodo l’zabno d’30 yawme, bnişo dmınfıq mqabıl du kewo d’Corona. Elo be bzabno matın l’awyutho dmaqimi xtute msarhıbe sa thume da nathrawothaththe laşan dımdawım u zawco du nqolo da sniqwotho.

U rişono du komisyon d’Urifi Ursola Fonder Liyen, bu knuşyo dsımla lu tboco froso mırla “u sxoro da thume qum da barmothoye dkothın mğer athrawotho, sbutho masırtoyo cama nathrawotho d’Urifi. U bceldbobo u virus d’Corona yo. Uklozım ucdo dsaymina u mede dıknofıl aclayna, laşan u sutoro da camaydan uda thumaydan. Ahna hadirena dsaymina u mede dıkmıtlıb menayna. Ubu zabno dhowe şuşote gıdmaydina zıd tedbire”.

Camgabıdathe, Fonder Liye mıctarafla da mşale folitiqoye d’Urifi lımqadamlın b’ulsoyutho ub’zuhoro lafu qento du virus d’Corona muşuroyo du bırbozayde. İ mşalonitho Urifoyto bi maqıblonutho dsımla acma i sferyawmo Almanoyto d’Bilt mırla “kmıtyaqnono d’ahna kulayna lulan yasifutho lu virus d’Corona mu şuroyo, elo camu zabno mahwele du kewano gıdlıbkina ebe l’zabno yarixo. Atedbire dıkmıhzewo meqım tıre aw tlotho yawme qaşye, klozım dmimodiwo mu şuroyo. Urifi ucdo qentrun du krizanoyo”.

Lfuth u ajans d’Frans Press, u menyono da farsufe dıbritho dmayithi bu kewo d’Corona, mati hul athmıl l’7813 mithe, ukitoste ucdo 189 alfo u 680 farsufe kayiwe b’146 athrawotho bı britho.