24/04/2022

U Huyodo Suroyo d’Urifi (ESU) u qoyumo Tuma Çelik frislin buyone cal u qtolğenso dan 1915

Ba mele; Kımathkrina a Sohde du qtolğenso dan Armınoye dan 1915, frısle u Huyodo Suroyo d’Urifi buyono bu duxronano da 107 eşne du qtolğenso dsımwola i mamlaxtho da Cuthmanoye cala came Mşihoye dıkhoyanwo ba thumayda. Camgabe d’ESU, u qoyumo şaroyo du camaydan bu parlamento d’Turkiya Tuma Çelik’ste frısle buyono u mathkarle u duxrono şatonoyo du camo Armınoyo.

24/04/2022

BRUKSEL – Xıd kull şato bu siqumano, frısle adşato’ste u Huyodo Suroyo d’Urifi-ESU buyono bu duxrono şatonoyo du qtolğenso du camo Armınoyo. Bu buyonano mawdıc; Bu yawmano d’24 Nison d’şafıc 107 eşne, kımathkırina u kımyaqrina i ruho da Sohde dnafiliwo bu qtolğenso dsımwo ban 1915 calu camo Armınoyo mi mamlaxtho da Cuthmanoye uda hayle bnayqyomayda.

ESU mırle; Bu qtolğensano dıkmidıc u qtolğenso qamoyo du doro da 20-qtılwo neşe u nacime, mahrıwo i yorututho marduthoyto-kenşoyto u tawdithoyto u lhewo makthabzabno catiqo. Bu qtolğensano dan Armınoye, qtılwo’ste u camo Suryoyo u Pontus Yawnoyo u kım’athıl falqo di hiyoyutho udu cuhdono da camani b’britho kula u kıtulbi kinutho u mawdyonutho ruşmoyto.

Bu buyonano ESU mahkele calu husrono rabo d’trewole u qtolğenso u mıqa Turkiya hol adyawma, kımdawmo dımşaklo qento b’Qarabax, bu garbyo d’Suriya ubu garbyo du Cıraq uli ithutho da came şerşoye da dukothani. Bu zabnano dkıtne cayne dbritho calu qrobo d’Ukraina, kmıstacmılo Turkiya i afthathe leşan a hçomayda dcala camani ucali tarmitho demoqratoyto. A hayle u tukose Emwothoye klozım dmaydi i mşaluthathe u dmaklın a hawbani d’Turkiya.

ESU bu huthomo kımawdıc’ste dıkorıh u hçomo dsim calu qoyumo di HDP Garo Paylan bi sbutho du talab dhawile calu qtolğenso u m’akadle u snodayde lu camo Armınoyo ulu ağono mşawtıfo dıklozım dmitahwe li mawdyonutho du qtolğenso dan 1915.

 

Camathe’ste u qoyumo du camaydan Tuma Çelik frısle buyono bu duxronano dan Armınoye, kımahke calu qtolğenso dsim calu cameydan ucala Armnoye u Pontusoye u komır; Fayıt 107eışne calu qtolğensano du nişayde u qşoco di Mşihoyutho mu qlimo’we. U cıl mıd lıkmitawde bu qtolğeınzano, heş kminase dmikase acle u mawxa’ste i jeoğrafiyaydan tfiko l’nefre.

Bu huthomo u qoyumo komır; Heş hol adyawma kımdawmo i siyase du qrobo udu qatlo cala came dlatne-mu camo dıksoyım u qrobo. İ mawdyonutho dbu Sayfo, kımasrolan bhıdode, u darbo’yo dıkmasırlan ba waridaydan u kowe darbo du dactid. Ucdo’yo u zabno dmallina calu qtolğenzo, inaqla dmıjğolina calu Sayfo-calu dactid druhayna kmıjğolina, lo zaycitu dmıjğolitu u msantina cal hıdode, u hawxa kiban dfuthina u darbo dıkmawbıl li mawdyonutho ulu şbuqyo.