25/04/2022

U Huyodo Suryoyo Tibeloyo simle u duxrono du Sayfo bu calway “ma turone d’Ararat hula turone d’Bethnahrin wu turo d’Lebnon, Sayfo ha Cuthmanoyo”

Bi cohnutho da 100 u şwac ışne du qtolğenso mariro du Sayfo du camaydan, u gabo du Huyodo Suryoyo Tibeloyo d’USUP mtayable turgomo rwiho bu qentrunayde bi mditho d’Bayrut. Lu turgomano, mıştawtafle mathlone d’gabe ud’şutose folitiqoye mşahılfe u mraşhe la guboye gawonoye d’Lebnon cam kunoşo d’noqufe d’USUP u menyono ma comure d’Bayrut.

25/04/2022

BAYRUT – Bu calway “ma turone d’Ararat hula turone d’Bethnahrin wu turo d’Lebnon, Sayfo ha Cuthmanoyo”, u gabo du Huyodo Suryoyo Tibeloyo d’USUP, mtayable turgomo rwiho bu qentrunayde u gawonoyo bi mditho d’Bayrut, bi cohnutho du yawmo şatonoyo du qtolğenso du Sayfo dsımwo bi şato da na’1915 bhaq du camo Suryoyo Oromoyo Othuroyo Kaldoyo uda Suryoye Marunoye du Turo d’Lebnon udu camo Armınoye wa Mşihoye du madınho gawonoyith.

Li hfituthathe, mıştawtafle u rişono du gabo d’USUP İbrahim Murad, u mathlono du gabo Armınoyo d’Alramğafar Ara Tarazyan wu mşatsono du Huyodo Suryoyo Marunoyo Amine Jules İskandar u mathlone d’gabe Mşihoye Lebnonoye u mraşhe la guboye gawonoye, kohne, akadimikoye, hfite u noqufe du gabo d’USUP.

Bu şuroyo di hfituthathe nqişo i sogitho athronoyto d’Lebnon wi sogitho du gabo du Huyodo Suryoyo d’USUP. Ubıthır mathe u notarrozo da sebwotho gawoye d’USUP Josef Hajjar bu mamlo dsımle mırle “bayn du slowo udi qyamto kito teşıcyotho d’haymonutho, d’Ağuno u mrodo d’camo Mşihoyo dkali b’fothıd da kboşe uda qtolğense da Cuthmanoye uda Turkoye, da Furşoye İranoye, da Caraboye uda Nuxroye. Kımakdina dlıgıdtocina ulıgıdşıbqina kul man dsımle qtolğenso aclayna in dlımıctarıf ba qtolğense dsımle ud’obe tezminat mqabıl du husrono dıhzele u camaydan wa came hrene dhawın debhe du Sayfo”.

Tarazyan bıthır mu mamlo dsımle bışmıd du gabo d’Alramğafar, u mşatsono du Huyodo Suryoyo Marunoyo d’Tur Levnon Amine Jules İskandar bu zabno du mamlayde magle cali lohitho dmahıt ışma “kafno”. İ lohithathe mgaşamla a’maşıqle du qtolğenso dsımwo cala Suryoye Marunoye bu Turo d’Lebnon. Ubıthır mathe i tahlufto du rişono du gabo d’USUP Layla Latte sımla mamlo. A’mıçğılone ba mamle dsımlın makadlın du dacbar kdome lu mede dkowe ucdo dıkminase dmişahılfi a’hiyoywotho makthabzabnoye da came şerşoye Mşihoye d’Bethnahrin udu mnadınho. U makadlın ste dgımdawmi u ağuno mqabıl dı Turkiya hul dmıctarfo bu qtolğenso du Sayfo da na’1915.

Camgabıdathe, u rişono d’USUP İbrahim Murad cam taşdarto mu gabo mıştawtaflın bu qerowo alohoyo du cedo di Qyamto dımtayıb athmıl bi cito d’Mor Afrem Suryoyo bı Bayrut, bi rişonutho du qaşişo George Cabdalla. Bıthır mıdkamıl u qerowo, i taşdarto d’USUP mahıtla klilo d’warde cali qoyumtho du Sayfo da Suryoye.